Skúli í Subway kaupir heildsölu

Hluthafar Eggerts Kristjánssonar hf. hafa selt allt hlutafé sitt í félaginu til nýrra eigenda. Kaupin eru gerð með fyrirvara um niðurstöðu áreiðanleikakönnunar á félaginu. Eggert Kristjánsson hf. er rúmlega 90 ára gamalt fjölskyldufyrirtæki sem sérhæfir sig í innflutningi og dreifingu til matvöruverslana, veitingahúsa og annarra. Þetta kemur fram í tilkynningu frá félaginu.

Kaupendur eru Leiti eignarhaldsfélag ehf. sem er í eigu Skúla Gunnars Sigfússonar, sem oft er kenndur við Subway, Hallgrímur Ingólfsson, sem var áður stærsti hluthafi og framkvæmdastjóri Byggt og búið, og Páll Hermann Kolbeinsson framkvæmdastjóri.

Í fréttatilkynningu segir að nýir eigendur hafi margháttaða reynslu af rekstri. „Ætlunin er að byggja félagið upp enn frekar á þeim góða grunni sem til staðar er,“ segir í tilkynningunni. Gunnar Aðalsteinsson, núverandi framkvæmdastjóri, mun áfram starfa fyrir félagið og aðstoða nýja eigendur eftir þörfum, en þetta kemur fram á vef Morgunblaðsins mbl.is.

Mynd: af heimasíðu eggert.is

/Smári