Stóri-Brami ný fisktegund við Íslandsstrendur

Þessi mynd var tekin í síðustu viku við Sandgerðishöfn, en hér heldur Rúnar Karl kokkur á Erling KE-140 á Stóra Brama sem veiddur var 12 sjómílur fyrir utan Vík í Mýrdal.
Rúnar sagði við fréttmann Freisting.is að hann hafði eldað Stóra-Brama við góðar undirtektir og skipverjar gengu saddir og glaðir frá borðhaldinu.

Sjómenn á Suðurnesjabátum hafa undanfarið orðið varir við svokallaðan Stóra-Brama á ( Common bream ) miðunum undan Reykjanesi. Hefur hann verið að slæðast með öðrum fiski á línunni.  Þeir sjómenn sem hafa veitt Stóra-Brama segja að þarna sé á ferð sælkerafiskur og þykir hann einna helst minna á túnfisk.

Þessi fisktegund hefur öðru hvoru veiðst við Íslandsstrendur en svo virðist sem menn verði meira varir við hann núna. Hvort það tengist hlýnun sjávar eða öðrum breytingum á náttúrunni er ekki hægt að fjölyrða um.

Heimkynni Brama-fisks er í Norðursjónum og í hlýrri hlutum Atlantshafsins.  Hann er silfurlitaður og svartur, ekki ósvipað og síld, og getur orðið um einn metri að lengd. Algengast er að hann sé á bilinu 40 – 60 sentimetrar.

Vorum við 5 Matreiðslumeistara í vettvangskönnu vegna Galadinners að meistarinn í Bláa Lóninu bauð okkur upp á að smakka þennan furðufisk og voru allir sammála að hér væri bragðgóður fiskur á ferð.

Heyrðum við af því að Fiskmarkaðirnir neituðu að taka hann til sölu hversu fáranlegt sem það getur nú verið og er ég þess handviss að fiskurinn á eftir að ná vinsældum hér á landi og hvet ég sjómenn til að koma með fiskinn beint til matreiðslumannana úr því að þeir vita ekki betur á áðurnefndum stað.

Sú útfærsla sem að Lónsmenn buðu uppá var eftirfarandi:

Stóri Brami vafinn hundasúru í netju með hvítlauksristuðum portobellosveppum,pomme Anna og humarfroðu.

Mynd: Freisting.is | Texti: Sverrir