Myndasafn: Stóreldhúsið 2026 vel sótt í Laugardalshöll

Fagsýningin Stóreldhúsið 2026 fór fram í Laugardalshöll dagana 5. og 6. nóvember og var vel sótt af starfsfólki stóreldhúsa og öðrum fagmönnum úr matvæla- og veitingageiranum.

Sýningin hefur verið haldin annað hvert ár frá árinu 2005 og hefur vaxið og eflst í gegnum tíðina. Stóreldhúsið er orðið mikilvægur vettvangur fyrir fagfólk til að hittast, kynna sér nýjungar og skoða vörur og þjónustu sem fjölmargir birgjar hafa upp á að bjóða.

Fjölbreytt úrval fyrir stóreldhúsageirann

Á sýningunni kynntu fyrirtæki fjölbreytt úrval af matvörum, tækjum, búnaði og þjónustu sem tengist rekstri stóreldhúsa. Þar gafst gestum tækifæri til að kynna sér það nýjasta á markaðnum, ræða við birgja og hitta kollega úr greininni.

Mikil gróska er í stóreldhúsageiranum, enda nær starfsemin yfir fjölbreytt svið. Þar má meðal annars nefna veitingastaði, hótel, mötuneyti, skóla, heilbrigðisstofnanir, bakarí, skyndibitastaði, framleiðslueldhús og matvælaiðnað.

Sýningin er sérstaklega ætluð fagfólki á þessum sviðum og er starfsfólki boðið að sækja hana án endurgjalds.

Yfir 25 ára reynsla af fagsýningum

Það er sýningarfyrirtækið Ritsýn sf. sem stendur að Stóreldhúsinu, en fyrirtækið hefur í rúmlega 25 ár skipulagt fjölmargar fag- og vörusýningar hér á landi.

Auk sýninga fyrir stóreldhúsageirann hefur Ritsýn staðið fyrir sýningum á sviði heilsu, flutninga, fjármála, landbúnaðar, umhverfismála, iðnaðar og sjávarútvegs.

Framkvæmdastjóri fyrirtækisins er Ólafur M. Jóhannesson.

Stóreldhúsið hefur í gegnum árin skapað sér fastan sess meðal fagfólks og er sýningin mikilvægur vettvangur fyrir fyrirtæki til að kynna vörur sínar og þjónustu beint fyrir þeim sem starfa við matvælaframleiðslu, matreiðslu og veitingarekstur.

Sýningin var opin frá klukkan 12 til 18 báða dagana.

Meðfylgjandi myndir tók Daníel Pétur Baldursson matreiðslumaður á sýningunni Stóreldhúsið 2026 í Laugardalshöll og eru þær birtar hér með góðfúslegu leyfi hans.

Myndir: Daníel Pétur Baldursson