Eldur kom upp í veitingastað á Selfossi

Fröken Selfoss
Mynd: facebook / Miðbær Selfoss

Eldur kviknaði í veitingastaðnum Fröken Selfoss í miðbænum á Selfossi í morgun. Reykkafarar frá Brunavörnum Árnessýslu náðu að slökkva eldinn, en talsverð vinna er fram undan við reykræstingu og hreinsun vegna reykskemmda.

Samkvæmt frétt Vísis urðu iðnaðarmenn sem voru að störfum í næsta húsi eldsins varir um klukkan átta í morgun og tilkynntu hann þegar í stað til slökkviliðs.

Veitingastaðurinn, sem er staðsettur við Brúarstræti 12, var mannlaus þegar eldurinn kviknaði. Þegar slökkvilið kom á vettvang var húsið fullt af reyk og voru reykkafarar sendir inn til að ráða niðurlögum eldsins.

Pétur Pétursson, slökkviliðsstjóri Brunavarna Árnessýslu, segir í samtali við Vísi að veruleg eftirvinna sé fram undan vegna reyksins sem fylgdi eldinum.

„Það verður örugglega alveg talsverð eftirvinna vegna reyks. Það fylgir þessu náttúrulega svo mikil lykt,“

er haft eftir Pétri í fréttinni.

Ekki liggur enn fyrir hvað olli eldsupptökunum og er orsök brunans til rannsóknar.

Mynd: facebook / Miðbær Selfoss