Tapasbarinn 13 ára – Þetta var alveg heljarinnar matarferð

Þann 21. og 22. október síðastliðinn héldu þeir Tapasmenn upp á 13 ára afmæli staðarins, með því að bjóða upp á 10 vinsælustu tapasrétti staðarins í gegnum tíðina á 590 kr. stykkið.

Ég mætti þann 22. október klukkan 17:00 og fékk með herkjum borð við innganginn en það var það eina sem laust var klukkan 17:00, þeir áttu nokkur laus borð klukkan 21:30 og nennti ég ekki að bíða það, heldur tók borðið við innganginn og er upp var staðið var ég mjög sáttur að hafa setið þar, því maður gat fylgst vel með hvernig þau unnu verkið.

Við innganginn er starfsmaður sem tekur á móti fólki og biður um nafn og sendir svo þjón með þau á borðið sem hefur verið tekið frá fyrir þau og afhendir þeim matseðla og býður drykkjarpöntun.

Ég ákvað að smakka þessa 10 vinsælustu og kemur hér lýsing á þeirri upplifun:

Marineraðar lambalundir með lakkríssósu

Mér finnst lamb og lakkrís alveg dúndurblanda.

Bleikja með hægelduðu papriku salsa

Frábær eldun á bleikjunni og paprikusalsað hæfilega sterkt.

Steiktur saltfiskur með sætkartöflumús

Stór og þykkur fiskur og bragaðist undursamlega vel og kartöflumaukið féll vel að fiskinum.

Hvítlauksbakaðir humarhalar

Sáraeinfaldur en sjúklega góður.

Marineraðar Kjúklingalundir með aioli

Bragðgóður réttur en kjúklingurinn var óeðlilega meyr.

Serrano með melónu og piparrót

Þessi skinka er löguð á staðnum og þvílíkt sælgæti sem hún er.

Grillaðar Lambalundir Samfaina með myntusósu

Lúnamjúkt kjötið, safaríkt og sósan passar vel við.

Spænsk eggjakaka með lauk og kartöflum

Skemmtileg tilbreyting og bara þrælgott.

Beikonvafin hörpuskel og döðlur með sætri chillisósu

Þessi réttur klikkar bara ekki.

Nautalundir í Bourgion sveppasósu

Flott steiking, meyrt og safaríkt, geggjað.

Í ábætir fékk ég Creme Catalana

Mjög bragðgott og flottur endir á dúndurmáltíð.

Þetta var alveg heljarinnar matarferð um spænska matreiðslu og ekki var að finna feil á henni, þjónustan alveg frábær, það liggur við að maður segi þarna eiga þjónanemar að fara í viku og læra að þjóna í traffík.

Ég gekk sæll og ánægður út í haustkulda raunveruleikans og fór að huga að næsta máli.

/Sverrir