Völundur Snær valinn besti kokkur Grand Bahama

Íslenski meistarakokkurinn Völundur Snær Völundarson heldur áfram að gera garðinn frægan á erlendri grundu.

Nýjasta skrautfjöðurin í hattinn var þegar hann var í gær valinn besti matreiðslumaður eyjunnar Grand Bahama, sem er ein stærsta eyjan í Bahama-eyjaklasanum auk þess sem veitingastaður hans, Sabor, var valinn besti veitingastaður eyjunnar.

Í fréttatilkynningunni kemur fram að verðlaunin eru mikill heiður fyrir Völund og ekki síst fyrir veitingastaðinn Sabor sem hefur einungis verið opinn síðan í mars.

Var samkeppninn hörð sem endranær og fjöldi matreiðslumeistara og veitingastaða um hituna en Völundur Snær hefur á undanförnum árum skapað sér orðspor sem einn færasti og frumlegasti kokkur Karíbahafsins.

Völundur á og rekur þessa stundina veitingastaðinn Sabor en í lok janúar opnar næsti staður sem hlotið hefur nafnið Oceano. Er hann staðsettur á ströndinni og verður bæði háklassa veitingastaður og strandklúbbur í senn. Einstök staðsetning býður uppá ótal möguleika auk þess sem húsnæðið hýsti áður einn sögurfrægasta stað eyjunnar. Mun staðurinn taka yfir 300 manns í sæti og sólbekki.

Verður staðurinn einn sá stærsti sem Íslendingur hefur opnað á erlendri grund.

Heimasíða Sabor: www.sabor-bahamas.com

[email protected]