Undirbúa nýjan og spennandi veitingastað í Firði

Ráðist hefur verið í miklar breytingar í veitingahúsarýminu á annarri hæðinni í verslunarmiðstöðinni Firði í Hafnarfirði, þar sem áður var veitingahúsið Silfur.

Að baki breytingunum standa Árni Björn Ómarsson, Ketill Sigurðsson, Helgi Sverrisson og Þórir Árnason. Þeir hafa síðustu árin rekið Hótel Hlíð í Ölfusi með góðum árangri.

Spurður um nýja veitingastaðinn segir Árni Björn að í bígerð sé að bjóða upp á matargerð í anda þess besta sem tíðkast við Miðjarðarhafið í bland við íslenska matargerð. Boðið verður upp á hlaðborð í hádeginu á virkum dögum en um helgar tekur brönsinn yfir. Á kvöldin verður fjölbreyttur og spennandi matseðill alla daga vikunnar. Þá verður boðið upp á ekta „high tea“ síðdegis alla daga.

„Þetta er spennandi tækifæri og ótrúlega gaman að byggja upp veitingahús á þessum stað. Staðsetningin er frábær og útsýnið eitt það besta í bænum. Við leggjum mikinn metnað í matseðilinn og að skapa hlýlega og notalega stemningu sem vonandi mun falla gestum okkar vel í geð,“

segir Árni Björn.

Stefnt er að opnun veitingahússins um mánaðamótin apríl maí næstkomandi.

Mynd: aðsend