Þessi hrepptu titilinn matreiðslu- og framreiðslunemar ársins 2015

Íslandsmót matreiðslu- og framreiðslunema fór fram þriðjudaginn 3. nóvember sl. í Hótel- og matvælaskólanum. Auglýst var eftir þátttakendum og samtals sóttu 20 nemar um að fá að taka þátt í keppni matreiðslunema og 10 sóttu um í keppni framreiðslunema.

Forkeppni var haldin miðvikudaginn 28. október og fimm efstu úr forkeppninni í matreiðslu kepptu svo í úrslitakeppninni þann 3. nóvember. Keppnisréttur var bundin við aldur en þau mega ekki vera eldri en 22 ára þann 1. maí 2016. Skilyrði er að nemar séu á námssamningi í maí 2016.

Berglind Kristjánsdóttir

Leó Snæfeld Pálsson

Í framreiðslu var keppt í borðskreytingu, blöndun drykkja auk þess sem þau leystu margvísleg verkefni sem tengdust faggreininni sérstaklega. Sigurvegarar í keppni framreiðslunema voru þau Berglind Kristjánsdóttir nemi á VOX Hilton, meistari hennar er Gígja Magnúsdóttir og Leó Snæfeld Pálsson nemi á Bláa Lóninu. Meistari hans er Kristján Nói Sæmundsson.

Haraldur Geir Hafsteinsson

Hinrik Örn Lárusson

Í úrslitakeppninni matreiddu matreiðslunemarnir tveggja rétta máltíð; aðalrétt og eftirrétt. Hráefnislistinn var kynntur 60 mínútur áður en matreiðslan hófst. Sigurvegarar í matreiðslu voru þeir Haraldur Geir Hafsteinsson nemi á Sjávargrillinu. Meistari hans er Gústav Axel Gunnlaugsson og Hinrik Örn Lárusson nemi á Radisson Blu. Meistari hans er Ólafur S. Guðmundsson.

Íslandsmeistarar nema í framreiðslu og matreiðslu mun taka þátt í Norrænu nemakeppninni sem fer fram hér á Íslandi í Hótel og matvælaskólanum dagana 8. – 9. apríl 2016.

Myndir: Ólafur Jónsson, sviðsstjóri matvæla- og veitingasviðs