Sveinn Kjartansson hættir á AALTO Bistro í Norræna húsinu – Sveinn: „…nú er komið að þáttaskilum. Mér bauðst heillandi tækifæri…“

Sveinn Kjartansson

„Ég hef staðið vaktina á veitingahúsinu mínu, AALTO Bistro í Norræna húsinu, í rúm fimm ár. Það hefur átt hug minn og hjarta allan tímann. Því þetta hefur verið afar skemmtilegur tími og gefandi,”

segir Sveinn Kjartansson matreiðslumeistari í samtali við veitingageirinn.is.

Sveinn hefur vakið hefur mikla athygli fyrir sjónvarpsþætti sína eins og Fagur fiskur og Nautnir norðursins sem hafa verið sýndir á RÚV og á hinum norðurlöndunum.

AALTO Bistro hefur markað sérstöðu í matreiðslu og við nýtingu á óhefðbundnu hráefni hér á Íslandi. Sveinn hefur farið ótroðnar og spennandi slóðir , sem og daðrað við skandinavíska matargerð undir miðevrópskum áhrifum við matargerð sína á AALTO Bistro.

„En nú er komið að þáttaskilum. Mér bauðst heillandi tækifæri að verða forstöðumaður matar,- og veitingasvið Seðlabanka Íslands og þáði það með þökkum, enda heillandi og spennandi áskorun,”

segir Sveinn og bætir við:

„Það verður tregablandin þáttaskil þegar ég hætti í Norræna húsinu, þessu einstaklega fallega húsi í Vatnsmýrinni og að kveðja allt það frábæra starfsfólk sem þar starfar. Ég er líka afar snortinn yfir því góða starfsfólki sem starfar með mér á AALTO Bistro. Þetta er samhentur hópur sem mun vinna með hjartanu með mér allt til loka ágúst.

Þá mun ég fyrst kveðja þessa perlu hér í Vatnsmýrinni þegar einhver góður veitingamaður kemur og tekur við keflinu af mér.”

Myndir: facebook / Aalto bistro