Rúmlega sex metra brauðterta sló í gegn á Menningarnótt

Frá vinstri: Örn Erlingsson matreiðslumeistari, Logi Einarsson, menningar-, nýsköpunar- og háskólaráðherra, og María Dóróthea Jensdóttir við brauðtertuna á Menningarnótt.

Blásið var til brauðtertuveislu á Menningarnótt laugardaginn 22. ágúst. Menningar-, nýsköpunar- og háskólaráðuneytið bauð gestum og gangandi til veislunnar þar sem boðið var upp á rúmlega sex metra langa brauðtertu, líklega þá lengstu sem gerð hefur verið hér á landi.

Örn Erlingsson og María Dóróthea Jensdóttir voru hress við undirbúning brauðtertunnar fyrir Menningarnótt.

Veislan hófst klukkan 15 í alrými ráðuneytisins á fyrstu hæð í Reykjastræti 8, á móti Hörpu. Auk brauðtertunnar var boðið upp á tónlist og sjónlist.

Örn Erlingsson matreiðslumeistari í Landsbankanum og María Dóróthea Jensdóttir sáu um allan undirbúning og gerð brauðtertunnar.

„Við vorum í tvo daga við undirbúninginn þar til brauðtertan var fullgerð.

Við María sáum um þetta frá A til Ö. Í tertuna fóru 13 kíló af majónesi, rúmlega 500 egg og meira en 20 kíló af skinku,“

sagði Örn í samtali við Veitingageirann.is.

Örn Erlingsson ásamt fjölskyldu sinni

Hann sagði Maríu eiga mestan heiðurinn af skreytingunum og lýsti henni sem einstaklega hæfileikaríkri.

María Dóróthea Jensdóttir lagði mikinn metnað í skreytingar brauðtertunnar.

Brauðtertan vakti mikla lukku meðal gesta en úr henni fengust hátt í eitt þúsund matarskammtar. Allt kláraðist á aðeins einni klukkustund.

Myndir: Úr einkasafni og birtar með leyfi.