Ný matreiðslubók með uppskriftum 25 fremstu matreiðslumanna landsins – Vídeó

Kápa bókarinnar 25 Best Chefs – Iceland, sem inniheldur 100 uppskriftir frá 25 fremstu matreiðslumönnum landsins.

Útgáfan 25 Best Chefs – Iceland er komin út og varpar ljósi á hæfni, sköpunarkraft og ástríðu íslenskra matreiðslumeistara víðs vegar af landinu. Í bókinni má finna 100 uppskriftir sem flestir geta útbúið heima hjá sér og hentar hún því jafnt vandvirkum áhugamönnum sem þeim sem vilja stíga sín fyrstu skref í eldhúsinu.

Bókin er glæsilega hönnuð og ríkulega myndskreytt og kemur út bæði á íslensku og ensku. Hún er því tilvalin gjöf fyrir alla sem hafa áhuga á matargerð eða vilja kynna sér íslenska matarmenningu á góðum grunni.

Margir matreiðslumennirnir í bókinni hafa starfað víða um heim áður en þeir sneru aftur heim og unnu sig upp í faginu, meðal annars í virtum Michelin-eldhúsum. Aðrir segja frá innblæstri og reynslu sem mótaði ferilinn, en sumir nefna að matargerð hafi opnað þeim dyr þegar annað lá ekki jafn vel fyrir.

Uppskriftirnar eru settar fram hlið við hlið með áhrifaríkum ljósmyndum sem sýna ástríðu íslenskra kokka fyrir hráefnum landsins. Þar má finna áhugaverðar útfærslur á fjölskylduvænum og hefðbundnum réttum, ásamt réttum sem byggja á nýstárlegum hugmyndum og skapandi nálgun.

Peter Marshall, útgefandi bókarinnar, segir verkið hafa verið unnið af mikilli elju og ástríðu og er afar ánægður með útkomuna. Hann bendir á að samstarfið við Þóri Erlingsson, formann Klúbbs Matreiðslumeistara, hafi tryggt að bókin endurspegli verk þeirra bestu í landinu. Markmiðið sé að hvetja heimakokka til að prófa nýjar uppskriftir og upplifanir í eldhúsinu.

„Við erum að vinna að bókaflokki sem nefnist 25 Best Chefs.

Hingað til höfum við gefið út bækur í Íslandi, Eistlandi, Finnlandi, Baskalandi, Úkraínu og Kosta Ríka, og fleiri eru á leiðinni.

Bókin um Ísland var ein sú auðveldasta í vinnslu. Kokkarnir voru mjög áhugasamir um að taka þátt og sýndu afburðafagmennsku við að skila inn uppskriftum og þróa einstaka rétti sérstaklega fyrir bókina.“

Sagði Peter Marshall í samtali við veitingageirinn.is.

25 Best Chefs – Iceland er fáanleg á netinu á 25bestchefs.com.

Myndband

Útgáfu bókarinnar 25 Best Chefs – Iceland var fagnað með einstökum kvöldverðarviðburði á Vox Brasserie, eins og sjá má í myndbandinu hér að neðan: