Matar- og skemmtihátíðin Food and Fun hafin

Lambahjörtu í vorbúning

Guðni Ágústsson, landbúnaðarráðherra, og Jón Karl Ólafsson, forstjóri Icelandair, settu í dag matar- og skemmtihátíðina „Food and Fun“. Viðstaddir setninguna voru þeir erlendu matreiðslumeistarar sem á landinu eru staddir til þess að elda ofan í gesti hátíðarinnar ásamt íslenskum starfsbræðrum og öðrum aðstandendum.

Við setninguna var skorin og síðan snædd tveggja metra löng og sérbökuð „Food and Fun“-ostakaka. Hátíðin er nú haldin í fimmta sinn og á fjölmörgum veitingastöðum og er á sama tíma og Vetrarhátíð Reykjavíkurborgar.

„Food and Fun“ hátíðin er liður í markaðsstarfi Icelandair, í samstarfi við íslenskan landbúnað, veitingamenn og Reykjavíkurborg. Tilgangur hennar er að kynna gæði íslenskra matvæla og veitingamennsku með nýstárlegum hætti, eins og segir í fréttatilkynningu frá Icelandair. Heimskunnir matreiðslumeistarar frá Bandaríkjunum og Evrópu munu elda ofan í gesti á veitingastöðunum Grillinu, Sigga Hall, Rauðará, Hótel Holti, La Primavera, Einari Ben, Apótekinu, Sjávarkjallaranum, Salti, Skólabrú og Vox.

Á laugardag verður í Listasafni Reykjavíkur í Hafnarhúsinu haldin alþjóðleg keppni matreiðslumeistara, sem opin verður öllum áhugamönnum um eldamennsku og matarmenningu. Sérstakur „Food and Fun“ hádegisverður verður í Hótel- og matvælaskólanum í Kópavogi í boði samgönguráðherra, þar sem nemendur fá að spreyta sig.

Greint frá á Mbl.is

[email protected]