Kræklingarækt hafin í Ísafjarðardjúpi

Kræklingarækt er hafin í Ísafjarðardjúpi og hefur í því sambandi verið stofnað félagið Vesturskel ehf. Búið er að leggja línur sem nemur 12 kílómetrum í Skötufirði og Hestfirði og er búist við að magnið sem myndast á þeim muni þrefaldast á næstu árum.

„Iðnaðurinn er mjög vaxandi í heiminum. Ný-Sjálendingar eru mjög stórir og Kanadamenn hafa byggt upp mjög mikla kræklingarækt t.d. við Nova Scotia á síðustu tíu til 15 árum. Þeir hafa þróað aðferðir og búnað við kræklingarækt sem mikið er notaður víða annars staðar“, segir Magni Örvar Guðmundsson, einn hluthafa Vesturskeljar ehf.

Að sögn Magna verður reynt að koma sem mestu magni á Íslandsmarkað en ef magnið margfaldast þurfi að huga að útflutningi. „Markaðshorfur eru góðar svo framarlega sem við komumst í kristileg flutningsgjöld. Evrópumarkaðurinn neytir um 600 þúsund tonn á ári og það er þörf á meiri skel.“

Greint frá á Mbl.is

[email protected]