Finnur Guðberg verður fulltrúi Íslands á Euroskills í Póllandi í haust – Þórey bakari: „Þetta er ein sterkasta keppnin sem við höfum séð í bakstri ….“

Þórey Lovísa Sigurmundsdóttir

„Þetta er ein sterkasta keppnin sem við höfum séð í bakstri,“

segir Þórey Lovísa Sigurmundsdóttir, einn af skipuleggjendum keppninnar í bakstri á Íslandsmóti iðn- og verkgreina sem fram fór í Laugardalshöll um helgina.

MATVÍS ræddi við Þóreyju þegar keppnin var í fullum gangi. Nemendur fengu það verkefni að gera eitt skrautstykki, þrjár týpur af vínarbrauði, hefðbundið brauð, baguette og brioche-brauð með ósætri fyllingu. Þau völdu sér þemu en ástin, sumarið og bleika slaufan urðu fyrir valinu.

Finnur Guðberg Ívarsson

Finnur Guðberg Ívarsson

Keppendur höfðu 10 tíma til að þreyta verkefnið, fimm stundir hvorn keppnisdag, og óhætt er að segja þeir hafi haft í mörg horn að líta. Þórey bendir á að í keppni sem þessari séu aðstæður öðruvísi en þau eru vön. Hitastigið í salnum, hitastig vatns í krana og annar aðbúnaður sé frábrugðinn.

„Þessir keppendur þurfa að nota þekkingu sína og kunnáttu til að leysa verkefnið og ná markmiðum sínum,“

segir hún.

Hekla Guðrún Þrastardóttir

Hekla Guðrún Þrastardóttir

Matthías Jóhannesson

Matthías Jóhannesson

Dómarar keppninnar dæmdu afurðir keppenda út frá útliti, bragði, fagmennsku og erfiðleikastigi. Svo fór að Finnur Guðberg Ívarsson sigraði keppnina og verður hann fulltrúi Íslands á Euroskills í Póllandi í haust. Aðrir keppendur voru Matthías Jóhannesson og Hekla Guðrún Þrastardóttir.

Haldin var forkeppni í Hótel- og veitingaskólanum í MK, þar sem bakstur er kenndur á Íslandi. Þar kepptu fimm nemendur um þrjú laus sæti í keppninni. Þórey segir að forkeppnin hafi verið hörð og litlu hafi mátt muna. „Þessir keppendur hér hafa allir verið á samningi, Finnur er hjá Bláa lóninu, Matti hjá Passion Reykjavík og Hekla hjá Hugge Coffey & Micro Bakery. Keppendurnir voru ýmist á þriðja ári eða lokaári í námi.

„Það er rosalega flott fyrir bransann að fá jafn sterka keppendur til að taka þátt og raun ber vitni nú. Þetta er það sem við viljum – framtíðin er björt,“

segir Þórey að lokum í samtali við Matvís.

Myndir: matvis.is

Myndir af keppnisborðum: Finnur Guðberg Ívarsson