Ekran er nýr bakhjarl Bocuse d’Or akademíunnar Íslands – Hinrik Örn: „Ferðalagið hefst núna og ég byrja á öllu sem er utan eldhússins….“

Við undirskrift samstarfssamnings Ekrunnar og Bocuse d’Or akademíunnar.
Hildur Erla Björgvinsdóttir, framkvæmdastjóri Ekrunnar, og Friðgeir Ingi Eiríksson, forseti Bocuse d’Or akademíunnar, handsala samkomulagið. Hinrik Örn Lárusson og Viktor Örn Andrésson standa að baki.

Matreiðslumaðurinn Hinrik Örn Lárusson keppir fyrir Íslands hönd í virtustu matreiðslukeppni heims, Bocuse d’Or. Ekran er nýr bakhjarl Bocuse d’Or akademíu Íslands og var samstarfssamningurinn undirritaður á blaðamannafundi í hádeginu í gær.

Bocu­se d’Or hefur verið haldin síðan 1987 í Lyon í Frakklandi en eingöngu 24 þjóðir fá keppn­is­rétt eft­ir að hafa kom­ist í upp úr for­keppni í sinni heims­álfu. Hinrik Örn lærði matreiðslu á Hótel Sögu, stofnaði Lux veitingar, var matreiðslumaður ársins 2024 og hefur áður keppt í Bocuse d’or svo óhætt er að segja hann sé hokinn af reynslu. Tveggja ára ferðalag Hinriks hófst í gær þar sem allt er lagt undir, hann stefnir alla leið og ætlar sér að næla í gullið.

„Mér líst vel á þetta tveggja ára ferðalag og hlakka til að hefja störf.

Ferðalagið hefst núna og ég byrja á öllu sem er utan eldhússins, smíða teymið í kringum keppnina, finna aðstoðarfólk, hitta hönnuði, markaðsfólk og fleira sem verður skemmtilegt.”

segir Hinrik.

„Þessi keppni er ekki aðeins sú virtasta heldur líka sú skemmtilegasta. Þetta er eins og að fara á leik í enska boltanum.”

Segir Þráinn Freyr Vigfússon varaforseti Bocuse d’Or akademíunnar á Íslandi.

Bocuse d’Or akademían á blaðamannafundi.
Fulltrúar Bocuse d’Or akademíunnar kynntu formlega þátttöku Íslands í keppninni árið 2026 og tilkynntu jafnframt um nýjan bakhjarl, Ekruna

Ísland hefur átt fulltrúa í keppninni síðan 1999 og alltaf verið meðal 10 efstu þjóða að keppni lokinni. Aðspurðir segja þeir slíkur árangur náist ekki nema fyrir tilstilli góðra bakhjarla og styrktaraðila og eru þeir þeim gríðarlega þakklátir fyrir stuðninginn.

Starfsfólk Ekrunnar hlakkar til að fylgjast með undirbúningi Hinriks við keppnina og við óskum honum góðs gengis í verkefnunum framundan.