Brút og Kaffi Ó-le loka

Veitingastaðurinn Brút í Pósthússtræti og kaffihúsið Ó-le í Hafnarstræti hafa lokað. Staðirnir voru reknir saman og það staðfestir Ragnar Eiríksson, matreiðslumaður og einn eigenda Brút, í samtali við fréttastofu Vísis. Hann átti staðinn ásamt Ólafi Erni Ólafssyni og Braga Skaftasyni veitingamönnum.

„Ég get staðfest það, að það er svo. Kaffi Ó-le og Brút er sami rekstur,“

segir Ragnar en vísar öðrum svörum til Ólafs Arnar. Fréttastofa hefur ekki náð tali af honum.

Í tilkynningu sem birt var á Facebook-síðu Kaffi Ó-le í dag kom fram að kaffihúsinu hefði verið lokað. Brút var opnaður árið 2021 og naut fljótt viðurkenningar, meðal annars sem Michelin veitingastaður þar sem áhersla var lögð á sjávarrétti. Kaffi Ó-le hóf einnig rekstur á svipuðum tíma og varð fljótt vinsæll viðkomustaður í miðborginni.

Mynd: instagram / Kaffi Ó-le