Bragð af bóndadegi – Reyktur cheddar á fullkomnum hamborgara

Bóndadagurinn er rétt handan við hornið. Reyndar bara næsta föstudag ef ég á að vera alveg nákvæm. Bændur eru vissulega eins misjafnir og þeir eru margir en minn kann alltaf vel að meta vel útilátinn heimagerðan hamborgara. Þessi er ekki flókinn í gerð en það sem gerir hann einstakan er cheddarostur með reykbragði sem gengur undir nafninu „Logi“.

Með dálitlu af fersku grænmeti, vænum beikonsneiðum, heimagerðri hamborgarasósu og stökkum frönskum til hliðar er þetta algerlega fullkomin bóndadagsmáltíð, tja, allavega fyrir þá sem kunna minna að meta súrmatinn.

Bóndadagsborgari með heimagerðri hamborgarasósu, beikoni og reyktum cheddar

Innihald:

2 stk. 140g hamborgarar (eða stærri ef vill)
2 stk. hamborgararabrauð
6 beikonsneiðar
2-4 sneiðar Logi – cheddar ostur með reykbragði frá Ostakjallaranum
Salat, magn eftir smekk
Rauðlaukur, skorinn í sneiðar
Tómatur, skorinn í sneiðar
Sjávarsalt og nýmalaður svartur pipar
Franskar kartöflur, ef vill

Aðferð:

Byrjið á því að útbúa hamborgarasósuna og geymið í kæli á meðan rest er græjuð.

Takið hamborgarana og þrýstið vel á þá með höndunum og fletjið enn meira út. Kryddið ríflega með salti og pipar. Setjið til hliðar.

Skerið grænmetið og hitið ofn eða airfryer og hitið franskar eftir leiðbeiningum. Steikið beikonið.

Steikið því næst hamborgarana á þykkbotna steypujárnspönnu eða grillið á útigrilli. Þegar borgurunum er snúið, leggið þá sneið af Loga yfir hamborgarann. Það má alveg setja tvær sneiðar af ostinum á hvorn borgara, allt eftir því hvað ykkur hugnast!

Þegar borgarinn er tilbúinn er gott að hita brauðin í örskamma stund í ofninum.

Mér finnst best að raða á hamborgarana þannig að á botninn komi fyrst sósa, því næst salatblöð, þá tómatsneiðar, þá borgarinn, ofan á hann kemur þá rauðlaukurinn, beikonsneiðar og svo lokað með toppbrauðinu sem hefur verið smurt vel með hamborgarasósunni.

Njótið með stökkum frönskum og það er ljómandi gott að nota restina af hamborgarasósunni sem ídýfu.

Heimagerð hamborgarasósa

4 msk. majónes
2 msk. 18% Sýrður rjómi frá Gott í matinn
1 msk. tómatsósa
2 tsk. amerískt gult sinnep
3/4 tsk. hvítlauksduft
¾ tsk. laukduft
1 tsk. paprikuduft
1 tsk. fljótandi reykur (liquid smoke)
6-8 sneiðar sýrðar gúrkur með dilli, fínt saxaðar

Aðferð:

Setjið majónes og sýrðan rjóma í skál og hrærið saman.

Bætið tómatsósu og sinnep saman við og hrærið.

Setjið þá restina af innihaldsefnunum saman við og hrærið vel. Látið taka sig í kæli á meðan þið græjið hamborgarana.