Borgar 400 þúsund í námskeið til að eiga möguleika á starfi á olíuborpalli

Daníel Sigurgeirsson

Daníel Sigurgeirsson matreiðslumeistari sem starfar nú við að reka 350 manna kantínu fyrir Wilberg hjá Talismann og TK, tók nú á dögunum Öryggis-, og skyndihjálparnámskeið til þess að eiga möguleika að vinna á olíuborpalli í Norðursjó.

Til dæmis fór einn dagur í námskeiðinu í brunaæfingu þar sem kennt var að bregðast við sprengingu, eld á mismunandi efnum og að læra að slökkva og koma áhöfn í öruggt skjól, reykköfun og fyrsta hjálp, slys voru sviðsett og svo ein stór æfing í lokin þar sem unnið var með lögreglu og slökkvuliði og gæslunni við að bjarga fólki úr miklum eldi og gera það klárt þyrluflutninga á sjúkrahús. Allir útskrifuðust úr þessum kúrs frá SOTS kurssenter.

Ég tók þessi námskeið til að hengja við CV mitt svo að ég eigi möguleika á að sækja um starf sem matreiðslumaður á olíuborpalli í Norðursjó. Einungis þeir sem hafa lokið þessum grunnkúrsum verða teknir til greina af þeim umsækjendum sem leggja inn umsóknir sínar til þeirra fyrirtækja sem sjá um að þjónusta pallanna,

…sagði Daníel í samtali við freisting.is aðspurður um hvers vegna hann fór á námskeiðið.

Hvað kostar námskeiðið og hvað telur þú miklar líkur á að þú fáir starfið?

Námskeiðin kostuðu saman 19.000 norskar krónur eða um 400.000 íslenskar krónur. Það eru engar auglýsingar um lausar stöður eins og er en ég veit að þegar að fyrirtæki eins og Statoil auglýsir eftir matreiðslumönnum á palli eru yfirleitt nokkur þúsund umsækjendur sem leggja inn umsóknir, svo að þetta er mjög eftirsótt.

Ég tel góðar líkur á því að ég komist inn í þennan bransa og eru þar nokkur atriði sem skipta þar máli fyrst ber að nefna menntunina, en ég er matreiðslumeistari að mennt með CMC titil og hef verið viðriðin bransann í 27 ár ég hef grunnkúrsana og hef lokið Norskunámi hér í Stavanger ásamt því að starfa sem Executive chef á Radisson Blu Royal 4 stjörnu hóteli hér í Stavanger í tæp 2 ár og er núna að reka 350 manna kantínu fyrir Wilberg hjá Talismann og TK. Svo að námið og reynslan vegur þungt ásamt því að hafa kúrsana.

Hvað eru launin í olíubransanum?

Launin eru að sjálfsögðu trúnaðarmál en ég hef heyrt um að laun séu um kringum 55 til 70.000 norskar á mánuði fyrir skatt og svo borgar maður sjómanna skatt sem er lægri en sá sem er í landi. Þetta er þá um 1.150.000 til 1.500.000 íslenskar krónur á mánuði og þú vinnur bara 12 vikur á ári og ert í 40 vikur í fríi þ.e.a.s. þú vinnur í 2 vikur 12 tíma á dag og ert svo í fríi í 4 vikur og ferð svo aftur út í 2 vikur og 4 vikur frí.

Við undirbúningi á frétt þá fór Daníel í atvinnuviðtal hjá Norsk Offshore Catering og eftir kluttutíma viðtal gekk hann út með samning í höndunum:

Ég fékk djobbið og er nú starfandi hjá Norsk Offshore Catering frá og með 15. júlí,

…sagði Daníel að lokum.

Sjá fleiri fréttir um Daníel hér.