Hvönn hefur áhrif á bragðgæði lambakjöts

Hvannarbeit hefur áhrif á bragðgæði lambakjöts að því er fram kemur í rannsókn sem Matís, Matvælarannsóknir Íslands hefur gert á lömbum frá Ytri-Fagradal á Skarðsströnd í Dalabyggð, en þetta kemur fram á Vesturlandsvefnum Skessuhorn.

Eins og fram hefur komið í fréttum Skessuhorns hefur samvinnuverkefni verið í gangi á vegum hjónanna í Ytri-Fagradal, Búnaðarsamtaka Vesturlands, Landbúnaðarháskóla Íslands og Matís. Tilgangur verkefnisins var að kanna hvort hvönnin hefði áhrif á kjötið á einhvern hátt, bæði bragð og aðra eiginleika þess.

Samkvæmt mati sérþjálfaðs hóps hjá Matís reyndust hvannalömbin hafa meiri kryddlykt og bragð í samanburði við lömb sem ganga í hefðbundu beitarlandi, en þau höfðu hið hefðbundna lambakjötsbragð. Stefnt er að frekari rannsóknum á þessu sviði á næstu misserum.

Eiríkur Blöndal, framkvæmdastjóri Búnaðarsamtaka Vesturlands sagði í samtali við Skessuhorn í gær að þarna væri sannarlega um nýjan kost að ræða í lambakjötsflórunni. Fróðlegt yrði einnig að skoða hvort hvönnin væri áhugaverð beitarjurt því að greinilegt væri að lömbin sæktu í plöntuna. Næsta ár yrði þá hugað að því að beita á hvönn á landi vegna þess að því fylgdi töluverð fyrirhöfn að flytja lömbin út í eyjar. „Þessi tilraun getur verið lykillinn að menningartengdri ferðaþjónustu fyrir þetta svæði og bændur í Ytri-Fagradal.”

[email protected]