Jómfrúin Lækjargötu – Klassískt danskt smurbrauð | Veitingarýni

Það var einn daginn sem mig blóðlangaði í danskt smurbrauð, og einfaldasta lausnin var sú að heimsækja veitingastaðinn Jómfrúnna í Lækjargötu.

Það er alltaf traffík hjá þeim á Jómfrúnni, þannig að ég var í fyrra fallinu, var 3. gesturinn og tekið á móti manni og vísað til borðs boðinn matseðill og hvort ég vildi eitthvað að drekka og úr varð öllum til furðu coke light.

Síðan var matseðillinn ígrundaður og eftirfarandi valið:

H.C.Andersen
Rúgbrauð með smjöri, stökku beikoni, lifrakæfu, púrtvínshlaup, piparrót og steinselja

Virkilega flott samsetning og ekki skemmdi fyrir að þjónninn kom með villisveppasósu og bauð mér að nota með sneiðinni og þá brosti maður út að eyrum.

Rauðspretta
Rúgbrauð með smjöri, steikt rauðspretta, remúlaði, laxarós m/ kavíar rækjum, spergli og sítrónu

Alltaf jafngott.

Uxabrjóst
Rúgbrauð með smjöri, sneiðar af uxabrjósti, sinnepspickles, piparrót, tómat og steinselju

Svakalegur góður réttur, sinnepspicklesinn tónar vel á móti söltu kjötinu og ferska piparróti flytur mann til Danmerkur.

Dönsk ávaxtaterta með þeyttum rjóma
Marsipanbotn með kransakökukanti, vanillukremi, ávöxtum og lyngele

Þessi danska ávaxtaterta er klassíker í sætabrauðs heimi, en ég lærði í Danaveldi að bera hana fram að sumarlagi með sýrðum rjóma og þessi útgáfa þeirra í Lækjargötunni sveik ekki málstaðinn.

Ég ræddi við þjóninn um uxabrjóstið og sagði hann mér að þetta væri innralæri þar sem það gengi svo erfiðlega að fá uxabrjóst svo kyndugt sem það er.

Þarna er ávallt faglærðir þjónar með margra ára reynslu og er ég viss um að það sé ein af ástæðunum sem gera hann eins vinsælan og hann er og lifðu þeir alveg upp til þeirra krafna.

Það var ekki laust við að maður héldi út í iðu borgarinnar hugsandi á dönsku það ánægður var ég.