Fyrsti sushi-vagninn á Íslandi

Hulda, Lúðvík og Arnþór.
Shirokuma Sushi-vagninn er staðsettur í Mæðragarði við Lækjargötu.

Hulda Björg og Arnþór vilja breyta sushi-markaðnum með nýjum sushi-vagni.

Þetta er allavega fyrsti svona vagninn sem ég veit um hér á landi og við erum mjög spennt,

segir Hulda Björg Jónsdóttir í samtali við Fréttablaðið.  Hún opnar í dag ásamt sambýlismanni sínum, Arnþóri Stefánssyni, fyrsta sushi-vagn landsins og ber hann nafnið Shirokuma Sushi.

Þau vilja gera sushi aðgengilegra fyrir fólk og vilja breyta markaðnum.

Við höfum gengið með þessa hugmynd í einhvern tíma en í haust fórum við að spá í þessu af einhverju viti. Okkur langar að sprengja upp markaðinn með okkar frábæra verði, við viljum að fólki geti fengið sér sushi oftar en bara á hátíðisdögunum, því þetta hefur verið svo dýrt hérna,

útskýrir Hulda Björg.

Lúðvík, Hulda og Arnþór

Á bak við sushi-ið standa Arnþór, sambýlismaður Huldu, og Lúðvík Þór Leósson, en þeir eru þaulreyndir í sushi-gerð.  Arnþór er menntaður matreiðslumaður frá Hótel- og matvælaskólanum í Kópavogi, ásamt því að hafa starfað á fjölda virtra veitingastaða hérlendis eins og t.d. Vox, Turninum 19. hæð, Suzushii, Sushisamba og Sushibarnum. Lúðvík hefur starfað við sushi-gerð frá árinu 2010 á Suzushii, Sushibarnum/Sakebarnum. Þeir félagar sáu um að reka Suzushii í Kringlunni árin 2011-2015.

Shirokuma Sushi-vagninn verður opnaður í Mæðragarði við Lækjargötu í dag en þess má geta að shirokuma þýðir ísbjörn á japönsku.

Greint frá í Fréttablaðinu.

Myndir: af facebook síðu Shirokuma Sushi.

Heimasíða Shirokuma Sushi.