Nýr veitingastaður við Skólavörðustíg

Hegningarhúsið við Skólavörðustíg í Reykjavík. Í gamla fangelsisgarðinum verður opnaður nýr veitingastaður á næsta ári.
Mynd: Guðmundur D. Haraldsson / Wikimedia Commons / CC BY-SA 3.0.

Gunnar Karl Gíslason, Michelin-kokkur og stofnandi Dill, hyggst opna nýjan veitingastað ásamt Ara Hermannssyni, stofnanda 280 Bakarí, og Hafsteini Júlíussyni, hönnuði og stofnanda HAF STUDIO. Staðurinn verður í nýbyggðum veitingaskála í gamla fangelsisgarðinum við Hegningarhúsið á Skólavörðustíg í Reykjavík.

Minjavernd hefur undanfarin ár unnið að endurgerð Hegningarhússins og er nú verið að innrétta veitingaskálann. Stefnt er að því að opna staðinn á nýju ári.

Ítölsk matargerð og íslenskt hráefni

Í samtali við mbl.is segir Gunnar Karl að þá félaga hafi lengi dreymt um að opna veitingastað saman. Hugmyndin sé að skapa afslappaðan og notalegan stað þar sem ítölsk matargerð verður í aðalhlutverki.

„Leitast verður við að nota eins mikið af staðbundnum hágæða hráefnum og kostur er og mun matargerðin endurspegla afslappað andrúmsloft staðarins,“

segir Gunnar Karl í samtali við mbl.is.

Ari Hermannsson segir markmiðið að bjóða upp á þægilega rétti og gott vín, án þess að flækja hlutina um of.

Útiveitingar og viðburðir í fangelsisgarðinum

Hafsteinn Júlíusson mun sjá um hönnun og innréttingar staðarins. Veitingaskálinn er hannaður af Hjörleifi Stefánssyni arkitekt, sem hefur einnig haft umsjón með endurhönnun Hegningarhússins.

Í gamla fangelsisgarðinum verður boðið upp á útiveitingar og þar verður einnig komið fyrir sviði fyrir ýmsa viðburði.

Á sama tíma er unnið að þróun matseðils og hugmyndafræði veitingastaðarins.

Nánar má lesa um fyrirhugaðan veitingastað á mbl.is.