Sigurvegarar í Eftirréttur ársins 2013

Hermann Þór Marinósson

Úrslit eru kunn í Eftirréttakeppni ársins sem var haldin fimmtudaginn 31.október á sýningunni Stóreldhús 2013 á Hilton Nordica Hótel.

Það voru 35 skráðir til keppni. Freistandi og glæsilegir réttir voru bornir fram en keppnisrétt höfðu þeir sem lokið hafa sveinsprófi í matreiðslu, konditori og bakaraiðn eða eru á nemasamningi í fyrrnefndum greinum. Þetta er fjórða árið sem keppnin er haldin.

F.v. Vigdís My Diem Vo, Garðar Kári Garðarsson og Hermann Þór Marinósson

Sá keppandi sem bar sigur úr býtum að þessu sinni er Hermann Þór Marinósson matreiðslumaður á Hilton. Í öðru sæti var Garðar Kári Garðarsson matreiðslumaður á Fiskfélaginu og í þriðja sæti var Vigdís My Diem Vo bakaranemi á Sandholti.

Dómarar að þessu sinni voru þau Fannar Vernharðsson sigurvegarinn frá síðasta ári og meðdómarar þau Hrefna Sætran og Vigdís Ylfa Hreinsdóttir.

Þema keppninnar að þessu sinni var “Pure Intensity” og var hún styrkt af súkkulaðiframleiðandanum Cacao Barry. Sigurvegarinn hlaut að verðlaunum námskeið hjá Chocolate Academy Cacao Barry. Heildverslunin Garri hefur haft veg og vanda að keppninni undanfarin ár.

Keppendur og dómarar

Að sögn Fannars formanni dómnefndar er mjög mikilvægt að keppni sem þessi sé haldin og hvetji til metnaðar í eftirréttagerð.

Myndir: Ásgeir Ingi Jóhannesson Long

/Smári