Kvöldstund við Hagatorg | „…Stjórnin byrjaði eiginlega sem húsband í Átthagasal“

Það var föstudagskvöldið 25. október, sem ég smellti mér inn á Hótel Sögu nánar tiltekið á veitingastaðinn Skrúð, þar sem ég ætlaði að smakka á steikarhlaðborðinu sem staðurinn hefur auglýst í tengslum við tónleika í Háskólabíó, sem er líka við Hagatorg.

Fékk ég mér lambalæri með bökuðum sætkartöflum, grilluðu grænmeti á spjóti og bearnaisesósu í aðalrétt en einnig var í boði svo sem naut, súpa, kræklingur.

Þvílík dásemd og mér til mikillar gleði var bearnaise sósan rétt löguð, en hér áður fyrr var sögubearnaisinn með kjötkrafti út í en þá vissu menn ekki að þegar krafti er bætt út í breytist hún í Foyot sósu.

Fékk ég mér svona bland af eftirréttar borðinu og smakkaðist þetta alveg prýðilega.

Þjónustan var með því betra sem ég hef upplifað í áðurnefndum stað og var það glaður maður sem þakkaði fyrir sig og tók kúrsinn út í Háskólabíó en þar skyldi hlýtt á Stjórnina halda upp á 25 ára afmæli. Fyrir þá sem ekki vita þá byrjaði Stjórnin eiginlega sem húsband í Átthagasal nú Sunnusal á níunda áratugu síðustu aldar og leysti ekki minni spámenn af en sjálfa Lúdó og Stefán.

Kom ég mér fyrir í sæti mínu og beið þess sem verða vildi og ekki frekar en fyrri daginn kom þetta tónlistarfólk manni ekki á óvart.

Þetta voru þeir albestu tónleikar ég hef verið á og stemmingin sem þau náðu, var alveg mögnuð.

Takk fyrir mig Saga og Stjórnin.

/Sverrir