Jólaplatti Hafnarinnar | „..mjög snyrtilega sett upp og girnilegt“

Eitt hádegið ákvað ég að kíkja á Höfnina og smakka á jólaplattanum þeirra. Var vísað til sætis og pantaði ég malt og appelsín ásamt áðurnefndum platta, svo kom drykkurinn og stuttu síðar volgt brauð með smjöri og nartaði maður í það meðan beðið var eftir aðaldæminu og svo skeði það, plattinn kom á borðið.

Hann er eins og lítið trébretti og á brettinu var:

Jólasíld, rúgbrauð, heimalagaður graflax, bleikja, fennel, sveitapaté, eplasalat, kalkúnabringa, rúsínusósa og hangikjöt í tartalettu

Þetta var mjög snyrtilega sett upp og girnilegt að sjá og eftir því sem ég vann mig í gegnum plattann þess stærra og breiðara varð brosið hjá mér og niðurstaðan var mjög gott.

Þetta er sniðugur valmöguleiki sem sífellt fleiri veitingastaðir bjóða upp á sem valkost í Jólamánuðinum, það kannski hentar ekki alltaf stórt hlaðborð með mörgum réttum og þá er þetta ein af þeim lausnum sem í boði er.

Hvernig væri að einhverjir staðir byðu nú uppá þorraplatta á næstu þorravertíð.