Chris Parsons – Við tjörnina

Við tjörnina hefur fært sig um set og eru nú nánast komin út á tjörnina, þ.e.a.s. í Ráðhúsið. Þar er lítill og notalegur veitingastaður sem tók allt það gamla góða sem gamla húsnæðið hafði upp á að bjóða.

Staðurinn hefur verið gestgjafi í Food and fun matarhátíðinni síðustu ár og það breyttist ekkert í ár þó skipt hafi verið um húsnæði. Þetta árið kemur kokkur frá Boston, Chris Parsons að nafni en hann rekur ásamt félaga sínum, Dan Kerrigan veitingastaðinn Steel & Rye sem er staðsettur í suður Boston. Þessi nýopnaði staður þeirra félaga var árið 2013 valinn besti nýji veitingastaðurinn af tveimur af stærstu staðarblöðunum í Boston, The Boston globe og Chronicle en ásamt þessum tveimur hafa þeir hlotið þessa viðurkenningu í ýmsum smærri fjölmiðlaeiningum í Boston sl. árið.

Átti Parsons og rak hann fyrri veitingastað sinn, The Parsons áður en sá staður varð of lítill fyrir eftirspurnina. Því ákvað hann ásamt viðskiptafélaga sínum að opna Steel & Rye.

En þá er komið að matnum sem þessi vinalegi veitingastaður bauð okkur upp á í kvöld:

Snjókrabbi, smokkfiskableks-brioche, ígulkerssmjör, hænuegg

Snjókrabbinn var vel eldaður og var briocheið steikt upp úr ígulkerssmjörinu sem gerði það, stökkt og djúsí.

Reykt ýsa, leturhumar, kartafla, vorlaukur, steinselja

Lyktin af þessum rétt var toppurinn. Heimilislegur á að sjá. Og þrátt fyrir þung hráefni í reyktu ýsunni, kartöflunni og rjómasósunni þá var rétturinn þó léttur og ferskur.

Þorskur í umslagi, sítróna, fennel, Einstök bjór, Kryddpylsumajo

Þorskurinn var eldaður í álpappír eins og má sjá á myndinni og var hann vel eldaður, bráðnaði upp í munninum á manni. Í smjörinu á botni álpappírsins fannst bragð bjórsins vel. Ef það er eitthvað sem vantaði þá var það örlítið meira grænmeti og Einstök bjórinn á borðið með fisknum, það hefði verið dásamlegt.

Tapioca, brennd appelsína, súrmjólk

Lítill og góður eftirréttur, búðingurinn léttur með góða áferð og appelsínan gaf góða bitra sýru á móti sætunni.

Það er svo sannarlega hægt að mæla með veitingastaðnum Við tjörnina enda býður staðurinn upp á útsýni sem margir veitingastaðir hafa ekki upp á að bjóða ásamt þessu heimilislega andrúmslofti sem gömlu húsgögnin gera fyrir staðinn. Við þökkum fyrir okkur.

/Ágúst og Bragi

Allar Food and fun fréttir og umfjallanir hér.