Terra Madre biðlar til veitingamanna á Íslandi

Þann 10. desember 1989, fyrir 25 árum síðan, voru Slow Food samtökin stofnuð formlega í Bra á Ítalíu (Piemonte). Terra Madre, sem þýðir Móðir Jörð, hefur verið heitið á samkomu matarsamfélaga víðsvegar að úr heiminum, sem er haldin í Torino á sama tíma og sýningin Salone del Gusto, á 2ja ára fresti.

Þessi matarsamfélög („food communities“), kokkar, smáframleiðendur, ungt fólk, bændur, fiskimenn, fræðimenn og neytendur, halda á lofti matvælaframleiðslu sem fer eftir gildum Slow Food hreyfingarinnar: maturinn á að vera góður, hreinn og sanngjarn – og koma úr héraði. Góður matur er mannréttindi, ekki forréttindi.

Á hverju ári er Terra Madre dagurinn haldinn hátíðlegur og allir um allan heim sem áhuga hafa taka þátt: koma saman og borða góðan mat úr eigin héraði, efna til bændamarkaða með mat úr héraði – eða hvað sem fólki dettur í hug.

Í ár, var ákveðið að biðla til veitingamanna á Íslandi sem aðhyllast Slow Food hugmyndafræðina og eru með veitingastað eða senda mat í fyrirtæki, að elda og selja/senda súpu eftir eigin uppskrift, sem verður unnin eingöngu úr íslensku hráefni, og ef hægt er, með hráefni sem er um borð í Bragðörkinni (sjá á www.slowfood.is). Miði verður sendur með til að vekja athygli á þessu og útskýra í fáum orðum hvað Terra Madre dagurinn er og til hvers er verið að halda hann hátíðlegan.

Slow Food Reykjavík mun útvega:

• Lógó TERRA MADRE dagsins sjá hér www.slowfood.com/terramadreday
• Lógó Slow Food Reykjavík
• Miða með stuttum texta sem hægt er að senda með matarbökkunum.

Fyrir nánari upplýsingar er hægt að hafa samband við Hinrik Carl Ellertsson í síma 864 3333 eða á netfangið kokkurinn@gmail.com og Dominique Plédel Jónsson í síma 898 4085 eða á netfangið dominique@simnet.is

Mynd: slowfood.com