Sjófiskur Sæbjörg, nýr samstarfsaðili Kokkalandsliðsins – Styðja keppnisstarfið

Sjófiskur Sæbjörg og Kokkalandsliðið undirrita nýjan samstarfssamning til næstu þriggja ára.
Frá vinstri, tveir eigenda Sjófisks Sæbjargar Sigurður Örn Arnarson og Friðbert Elí Kristjánsson auk Björns Braga Bragasonar forseta Klúbbs matreiðslumeistara.

Í vikunni undirrituðu eigendur Sjófisks Sæbjargar og forseti Klúbbs matreiðslumeistara sem rekur Kokkalandsliðið þriggja ára samstarfssamning.

Sjófiskur Sæbjörg mun sjá Kokkalandsliðinu fyrir öllum fiski til æfinga og styrkir um leið starf liðsins og klúbbsins með fjárframlagi.

Sigurður Örn Arnarson sölustjóri Sjófisks Sæbjargar hafði þetta um samstarfið að segja

“Við viljum leggja starfi Kokkalandsliðsins og Klúbbi matreiðslumeistara lið og rækta tengslin við þennan mikilvægasta markað okkar enn frekar. Við höfum sinnt þjónustu við veitingahús og stóreldhús um árabil og vitum hversu mikilvægt þetta starf er. Berum fyrir því mikla virðingu og dáumst að þróuninni sem á sér stað hjá kokkum á Íslandi. Þróun sem er drifin áfram af Kokkalandsliðinu og klúbbnum og áformum að standa myndarlega að baki starfinu.”

Fyrirtækið Sjófiskur Sæbjörg

Sjófiskur Sæbjörg er heildverslun með ferskan fisk og viðskiptavinir þess eru fyrst og fremst á höfuðborgarsvæðinu, veitingahús, stóreldhús og mötuneyti fyrirtækja. Í fyrirtækinu er áratuga reynsla í vinnslu fisks, hráefnaöflun, sölu og dreifingu. Afhendingaröryggi er gott og þjónustustig hátt. Eigendur eru allir starfandi hjá fyrirtækinu.

Vinnsla og dreifing

Fyrirtækið er í eigin húsnæði á Eyjarslóð. Vinnslan er rúmgóð, nútímaleg og vel tækjum búin, stenst ströngustu kröfur. Staðsetning á Grandanum í hjarta Reykjavíkur er ákjósanleg til að þjónusta veitingahúsamarkaðinn sem er að langstærstum hluta í næsta nágrenni. Dreifing fer fram með eigin bílum innan Höfuðborgarsvæðisins.

Sjófiskur Sæbjörg kappkostar að veita afburða þjónustu og samkeppnishæf kjör. Fyrirtækið vill vera fyrsti kostur fyrir veitingahús og stóreldhús og byggja langtíma viðskiptasambönd með viðskiptavinum sínum.