Ilmandi skötuveisla á Hótel Reykjavík Grand á Þorláksmessu 23. desember 2024.

Tímasetningar: kl. 11:30 og kl. 13:30

Á boðstólum verður kæst vestfirsk skata, smáskata, saltfiskur, reykt- og nætursöltuð ýsa, skötustappa, plokkfiskur, siginn fiskur, hnoðmör, brætt smjör og hamsatólg, kartöflur, rófur, gulrætur, soðkökur, rúgbrauð og laufabrauð. Einnig verður boðið upp á síld, harðfisk, grafinn & reyktan lax. Og síðast en ekki síst fjölbreytt eftirréttahlaðborð.

Verð:
7.900 kr. á mann
6-11 ára hálft verð – 3.950 kr á mann
0-5 ára frítt – 0 kr á mann
Skemmtiatriði: Gísli Einarsson

Athugið: Fyrir hópa stærri en 10 manns vinsamlegast sendið tölvupóst á [email protected] eða hafið samband í síma 514 8000 (og veljið 2 fyrir ráðstefnudeild).

Færri sæti eru í boði en undanfarin ár, því er mælt með að tryggja sér sæti sem fyrst. Skötuhlaðborðið fer fram á veitingastaðnum Grand Brasserie, Setrinu og Hvammi. Eftir bókun verða sendar upplýsingar um staðsetningu borðs viðkomandi bókunar. Athugið að salurinn Gullteigur er ekki í notkun vegna framkvæmda.

Hátíðarkvöldverður Klúbbs Matreiðslumeistara verður haldinn 11. janúar 2025 og verður haldinn að þessu sinni í Hörpu. Þessi viðburður hefur verið haldinn árlega síðan 1988, fyrir utan tvö ár sem allir þekkja (Covid tímabilið), hefur frá upphafi verið fastur punktur í skemmtanahaldi landans.

Hátíðarkvöldverðurinn er aðalfjáröflun Klúbbs matreiðslumeistara þar sem bestu matreiðslumenn landsins taka höndum saman og framreiða margrétta hátíðarmatseðil ásamt sérvöldum eðalvínum.

Allur ágóði kvöldsins rennur til starfsemi Klúbbs matreiðslumeistara, þannig verður klúbbnum kleift að efla matargerðarlist og styðja framgöngu klúbbfélaga bæði hér heima og erlendis með rekstri Kokkalandsliðsins og keppninnar um Kokk ársins. Næsta stóra mót Kokkalandsliðsins er heimsmeistaramót sem haldið verður í Lúxemborg 2026.

Þetta er einstakt tækifæri til þess að njóta kvöldverðar á heimsmælikvarða þar sem úrvalslið matreiðslumanna leika við hvern sinn fingur.

Eftirspurn hefur verið mikil og fyrir áhugasama er hvatt til að tryggja sér miða sem allra fyrst. Miðaverð er 75.000 kr. og rennur allur ágóði kvöldsins til Kokkalandsliðsins.

Yfirmatreiðslumaður kvöldsins er Arnar Darri Bjarnason.

Fordrykkur hefst kl. 18.00 í Hörpu

Hafið í huga að samkvæmisklæðnaður er áskilinn; síðkjólar og smóking.

Meðfylgjandi myndir tók Mummi Lú sem sýna frá Hátíðarkvöldverði KM í janúar 2024.

Þorrablót Miðbæjar & Hlíða fer fram laugardaginn 1.febrúar 2025 í N1 höllinni Hlíðarenda.

Húsið opnar kl.18.30 og lokar fyrir matargesti kl.20.00. Borðhald og skemmtidagskrá hefst kl.20.15. Húsið opnar aftur fyrir ballgesti kl.22.30.

Múlakaffi mun bjóða upp á Þorraveislu ásamt ljúffengum veislumat og vegan réttum.

Friðrik Ómar og Jógvan Hansen koma salnum í rífandi stemningu yfir borðhaldi. Diljá Pétursdóttir og Stuðlabandið trylla síðan dansgólfið fram eftir nóttu.

Salurinn verður með 10 manna hringborðum og eru flest borð seld í heilu lagi. Hægt er að kaupa staka miða á samsett borð. Jafnframt er hægt að kaupa miða bara á ballið sem hefst kl. 22.30.

Miðasala á tix.is

Á Íslandsmóti iðn- og verkgreina 13. – 15. mars 2025 í Laugardalshöll verður að þessu sinni keppt í 19 faggreinum þar sem keppendur takast á við krefjandi og raunveruleg verkefni sem reyna á hæfni, skipulagshæfileika og fagmennsku.

Greinarnar eru: bifvélavirkjun, bifreiðasmíði, bílamálun, forritun, grafísk miðlun, hársnyrtiiðn, húsasmíði, málmsuða, pípulagnir, rafeindavirkjun, rafvirkjun, skrúðgarðyrkja, snyrtifræði, vefþróun, veggfóðrun og dúkalögn, gull- og silfursmíði, fataiðn, málaraiðn og múriðn.

Sigur á Íslandsmótinu getur gefið möguleika á að keppa í Evrópu á Euroskills en næsta keppni fer fram í Herning í Danmörku í september 2025.

18 sýningargreinar

Allar keppnisgreinarnar 19 sýna einnig og kynna sig fyrir gestum. Á Minni framtíð sýna að auki 18 iðn- og verkgreinar á mótssvæðinu og leyfa gestum jafnvel að prófa handtökin. Þær sýningargreinar sem um ræðir eru: hljóðtækni, kvikmyndatækni, ljósmyndun, matreiðsla, framreiðsla, bakstur, konditor, kjötiðn, blikksmíði, megatronics, rennismíði, vélvirkjun, blómaskreytingar, garð-og skógarplöntuframleiðsla, ræktun matjurta, jarðvirkjun, búfræði og sjúkraliðun.

24 framhaldsskólar kynna námsframboð

24 framhaldsskólar munu kynna námsframboð sitt en von er á rúmlega 9000 nemendum 9. og 10. bekkja á viðburðinn. Skólarnir eru: Borgarholtsskóli, Fjölbrautaskóli Suðurlands, Fjölbrautaskóli Norðurlands vestra, Fjölbrautaskóli Suðurnesja, Fjölbrautaskóli Vesturlands, Fjölbrautaskólinn í Breiðholti, Fjölbrautaskólinn við Ármúla, Framhaldsskólinn á Laugum, Framhaldsskólinn í Mosfellsbæ, Hússtjórnarskólinn í Reykjavík, Kvennaskólinn í Reykjavík, Landbúnarháskóli Íslands, Lýðskólinn á Flateyri, Menntaskólinn í Kópavogi,  Menntaskólinn í Reykjavík, Menntaskóli Borgarfjarðar, Menntaskóli í tónlist, Menntaskólinn á Ísafirði, Menntaskólinn við Sund, Myndlistaskólinn í Reykjavík, Tækniskólinn, Verkmenntaskólinn á Akureyri, Verkmenntaskóli Austurlands og Verzlunarskóli Íslands.

Stuðningur við nám ungs fólks

Hefð er fyrir því að menntastofnanir, samtök ungs fólks og fyrirtæki sem styðja við nám ungs fólks kynni starfsemi sína. Þær menntastofnanir, samtök og fyrirtæki sem hafa nú þegar skráð sig til leiks eru:

Félag náms- og starfsráðgjafa, Iðnú, RAFMENNT, Sindri, RSÍ-ung, Samband íslenskra framhaldsskólanema og Miðstöð menntunar og skólaþjónustu. Rannís kynnir Erasmus+ styrki og möguleika á námi erlendis og Fjölbrautskólinn í Breiðholti kynnir sérstaklega Fab Lab smiðjuna sem er hluti af skapandi samfélagi Breiðholts en markmið Fab Lab er að efla tæknilæsi og nýsköpun í samfélaginu.

Áhersla á STEAM-greinar

Þungamiðja viðburðarins er alltaf kynning á iðn- og verknámi á Íslandi en nú verður sérstök áhersla lögð á kynningu á STEAM-greinum sem eru vísindi, tækni, verkfræði, listsköpun og stærðfræði. Segja má að þessar greinar tengi sterkt saman iðn- og tækninám og bóklegar greinar. Þessi kynning verður í tengslum við kynningu á námi á Minni framtíð til grunnskólanema.

Nánar á namogstorf.is

Meðfylgjandi mynd tók Sigurjón Bragi Geirsson

Heimsmeistarakeppnin í kjötskurði fer fram í París dagana 30. -. 31 mars 2025. Nemakeppnin „World champion butchers apprentice“ og ungliðakeppnin „Young butcher“ fara fram 30. mars og landsliðin keppa 31. mars.

Keppnirnar verða haldnar þar sem Ólympíuleikarnir fóru fram og verður í einni af höllunum sem notaðar voru á Ólympíuleikunum.

Íslenska landslið kjötiðnaðarmanna keppir fyrir Íslands hönd.

Keppnisfyrirkomulagið er þannig að í hverju liði eru 6 keppendur og á hvert lið að úrbeina 1/2 naut, 1/2 svín, 1/1 lamb og 5 kjúklinga og setja upp glæsilegt hlaðborð með öllum vörunum á 3 klst. 15 mín.

Dómarar mega spyrja alla meðlimi í landsliðinu spurningar á meðan keppnin stendur yfir, t.a.m. er auðvelt að elda vörurnar, hvaða eldunaraðferðir og eldunartímar eru fyrir vörurnar o.fl.

Það eru 15 lönd sem taka þátt á næsta ári, sem eru : Ástralía, Belgía, Brasilía, Kanada, Frakkland, Þýskaland (ríkjandi heimsmeistari), Bretland, Ísland, Írland, Ítalía, Nýja Sjáland, Portúgal, Rúmenía, Spánn og Bandaríkin.

Hráefnið sem að íslenska liðið notar í keppnina er að mestu leyti frá Frakklandi.

Meðlimir í landsliðinu eru:

Jón Gísli Jónsson – Kjötkompaní og fyrirliði.
Dominik Przybyla – Esja gæðafæði.
Guðmundur Bílddal – Esja gæðafæði.
Davíð Clausen Pétursson – Ferskar kjötvörur.
Hermann S. Björgvinsson – Ali matvörur
Benedikt Þorvaldur Guðgeirsson Hjarðar – BG kjötafurðir