Nýr þjálfari kokkalandsliðsins, Georg Arnar leiðir liðið til Lúxemborgar 2026

Georg Arnar Halldórsson

Georg Arnar Halldórsson hefur tekið við þjálfun íslenska kokkalandsliðsins og stýrir nú undirbúningi þess fyrir Heimsmeistaramótið í matreiðslu sem fram fer í Lúxemborg árið 2026. Markmiðin eru skýr og metnaðurinn mikill, en íslenska liðið stefnir markvisst á að berjast um sæti á verðlaunapalli á mótinu.

Þetta kemur fram í tilkynningu frá Klúbbi matreiðslumeistara, sem ber ábyrgð á starfsemi og keppnisundirbúningi kokkalandsliðsins.  Þar kemur fram að með ráðningu Georgs Arnars sé stigið mikilvægt skref í áframhaldandi uppbyggingu liðsins, þar sem áhersla er lögð á faglegan undirbúning, skýra stefnu og sterka liðsheild.

Georg Arnar tekur við af Snædísi, sem hlaut það einstaka tækifæri að keppa á Bocuse d’Or fyrir Íslands hönd. Að fá að taka þátt í þeirri keppni er talinn einn stærsti draumur keppniskokka og mikil viðurkenning á faglegum styrk og hæfni.

Georg Arnar er reynslumikill matreiðslumaður með glæsilegan feril bæði hérlendis og erlendis. Hann var sjálfur meðlimur íslenska kokkalandsliðsins árið 2016 og þekkir því vel þær kröfur og áskoranir sem fylgja keppni á hæsta alþjóðlega stigi. Með víðtæka fagþekkingu og skýrt leiðtogahlutverk er hann talinn lykilmaður í áframhaldandi þróun og metnaðarfullri vegferð íslenska kokkalandsliðsins.

„Það er heiður að fá tækifæri til að leiða íslenska kokkalandsliðið,“

segir Georg Arnar.

„Við erum með hæfileikaríka kokka og glöggan metnað til að gera enn betur. Undirbúningurinn fyrir heimsmeistaramótið 2026 er á fullu, og við stefnum ákveðið á að koma Íslandi á verðlaunapall.“

Þórir Erlingsson, forseti Klúbbs matreiðslumeistara, segir ráðninguna marka mikilvægt skref:

„Georg býr yfir áralangri reynslu, frábærri fagmennsku og djúpri þekkingu á starfi landsliðsins. Hann hefur sýnt að hann getur hvatt og leitt fólk áfram, og við erum sannfærð um að liðið verði í mjög traustum höndum. Markmiðið er skýrt, Ísland á að vera meðal þeirra allra bestu í Lúxemborg 2026.“

Mynd: aðsend