Ný bragðsprengja frá Nóa Síríus vekur lukku

Tromp Hvellurinn gómsæti frá Nóa Síríus, þar sem hið ómótstæðilega Tromp er umlukið ljúffengu og krispí mjólkursúkkulaði, hefur sannarlega glatt bragðlauka landsmanna undanfarin ár. Nýverið kom á markað ný útgáfa af þessu vinsæla sælgæti, Tromp Hvellur með jarðarberjabragði.

Ferskt jarðarberjabragðið tónar fullkomlega við sætt súkkulaðið og stökkt krispið fullkomnar svo bragðupplifunina.

„Trompið hefur lengi átt sérstakan stað í hjörtum Íslendinga og upprunalegi Tromp Hvellurinn vakti strax mikla lukku. Það er gaman að segja frá því að Hvellurinn með jarðarberjabragði virðist ætla að ná álíka vinsældum,“ segir Alda Björk Larsen, markaðsstjóri Nóa Síríus. „Við erum afar stolt af þessum nýja Hvelli og neytendur virðast sammála því hann hefur rokið úr hillum verslana,“ segir Alda og bætir við að varan sé auðvitað hinn fullkomni félagi til að deila með sér í útilegum sumarsins.

Allt súkkulaði frá Nóa Síríus er vottað af Cocoa Horizons samtökunum. Það þýðir að kakóhráefnið er ræktað við mannúðlegar aðstæður sem ógna ekki lífríki jarðar. Með því er fyrirtækið hluti af því verkefni að tryggja sjálfbærni kakóræktunar til framtíðar.