Kol í hádeginu – Veitingarýni

Það var í hádeginu 2. maí sem ég ákvað að heimsækja einn af nýjustu stöðum borgarinnar en það var Kol á Skólavörðustíg og upplifa hvort Kári og félagar gætu enn komið mér á óvart.

Ég var fyrsti gesturinn þennann dag og móti mér tekur viðkunnanlegur drengur og vísar mér til sætis, býður matseðil og er snöggur að koma með bensín á kantinn.

Ég skoða matseðillinn í smástund, lít svo í kringum mig og velti fyrir mér innréttingunni og er nokkuð sáttur með það sem fyrir augun ber, svo tek ég eftir þjónunum klæddir í gallabuxur, stuttermaboli og með hálssvuntu og svaka tattú á handleggjunum og fór í gegnum huga minn, hvað ertu að koma þér í núna og svarið kemur í lok þessa pistils.

Það sem ég valdi mér var eftirfarandi:

Rækjukokteill
Jöklasalat, rækjur, sítróna, agúrkur, Tabascodressing.

Rækjurnar voru marineraðar, en samt fann maður bragðið af þeim, salatið var ferskt og sósan mjög frískandi og góð, klassískur réttur útfærður upp á 10.

Svo kom:

Uxabrjóst
Kartöflumús, sinnepsfræ, trufflumascarpone, nautasoðgljái

Þetta er sá albesti réttur sem ég hef smakkað af uxabrjósti, hrein unun að borða hann.

Og í lokin:

Lemontart
Þeyttur sýrður rjómi, karamellu síróp, crumble.

Himnenskur endir á frábærri máltíð á sjálfan afmælisdaginn

Þegar upp var staðið, þá voru þessir þjónar hreint út sagt magnaðir og minnist ég ekki að hafa séð eins fagmannlega unnið, síðan í gamla daga þegar þjónar voru hálaunamenn.

Tattúið var bara orðið ásættanlegt í restina og eyðilagði ekki nokkurn skapaðan hlut. Til hamingju.

Það var einn sem gekk út á glitskýi eftir þessa upplifun.

Takk fyrir mig

/Sverrir

Auglýsingapláss