Kókos greipaldin kaka

Kókos greipaldin kaka

Ég mæli með því að baka þessa með kaffinu um helgina. Hún er svakalega góð en sum börn eru ekki hrifin af henni svo ég mæli með henni fyrir fullorðna.

Það má líka nota aðra sítrusávexti og aðrar bragðtegundir af jógúrt til að breyta bragðinu ef þið viljið. Appelsína og mangójógúrt er líka svakalega góð blanda og svo lime og hindberjajógúrt líka. Auðvelt að breyta kökunni alveg bara með hráefninu.

Innihald:

190 g hveiti
1 ½ tsk lyftiduft
3 egg
180 g kókosjógúrt
200 g sykur
120 ml olía
60 ml safi úr rauðu greipaldin + fínt raspaður börkurinn
1 tsk vanilluduft
Sneiðar af rauðu greipaldin og kókosflögur til að skreyta

Aðferð:

Hitið ofninn upp í 180°c. Setjið hveitið og lyftiduftið saman í skál. Setjið svo eggin, jógúrtið, sykurinn, olíuna, safinn og börkinn af greipaldinu, vanilluna saman í skál og blandið vel.

Bætið svo blautu blöndunni í skömmtun við þurru blönduna en forðist að ofhræra þetta. Setjið blönduna í form klætt með smjörpappír og bakið í 40-50 mínútur eða þar til kakan er bökuð í gegn.

Myndir og höfundur: Hrefna Sætran, matreiðslumeistari.