Kokkur ársins 2016 – Fimm keppendur komnir í úrslit

Fimm keppendur komnir í úrslit
F.v. Denis Grbic, Ari Þór Gunnarsson, Axel Björn Clausen Matias, Hafsteinn Ólafsson og Sigurjón Bragi Geirsson

Undanúrslit í keppninni Kokkur ársins 2016 fóru fram í gærdag, mánudaginn 8. febrúar á Kolabrautinni í Hörpu. Tíu keppendur tóku þátt í undanúrslitum en fimm komust áfram og tryggðu sér þátttökurétt í úrslitakeppninni sem haldin verður í Hörpu laugardaginn 13. febrúar.

Allir keppendur útbjuggu kjúklingarétt og dæmdi 8 manna dómnefnd réttina út frá útliti, bragði og vinnubrögðum í eldhúsi.  Óhætt er að segja að dómnefnd hafi átt ærin starfa við að velja á milli réttanna tíu enda hver öðrum betri.

Þeir 5 keppendur sem komust áfram í úrslitakeppnina eru:

• Ari Þór Gunnarsson – Fiskifélagið
• Axel Björn Clausen Matias – Fiskmarkaðurinn
• Denis Grbic – Grillið Hótel Saga
• Hafsteinn Ólafsson – Nasa
• Sigurjón Bragi Geirsson – Kolabrautin

Einnig var öllum sigurvegurum keppninnar frá upphafi veitt viðurkenning en keppnin hefur verið haldin frá árinu 1994.

Dómnefndin að störfum

Úrslitakeppnin verður sem fyrr segir haldin laugardaginn 13. febrúar í Flóa í Hörpu milli kl 15:00-23:00. Keppendur munu útbúa þriggja rétta matseðil sem samanstendur af forrétti, aðalrétti og eftirrétti.  Samhliða úrslitakeppninni verður glæsilegur fjórrétta Kokkalandsliðskvöldverður og vegleg dagskrá.

Ragnheiður Elín Árnadóttir Iðnaðar-og viðskiptaráðherra mun krýna sigurvegara keppninnar kl. 23:00  sem hlýtur titilinn Kokkur ársins 2016.

Sigurvegarinn mun keppa fyrir Íslands hönd í keppninni „Nordic Chef Of The Year“ sem fram fer 8. mars 2016 í Herning Danmörku.

Það eru Klúbbur matreiðslumeistara og Kokkalandsliðið sem standa að keppninni Kokkur ársins, að því er fram kemur í tilkynningu.

Ljósmyndir: Eiríkur Ingi Helgason