Heilsteiktur hreindýravöðvi með púrtvínssósu

Heilsteiktur hreindýravöðvi með púrtvínssósu

Fyrir 4-5

1 kg hreindýravöðvi, t.d. innralæri eða klumpur
salt og nýmalaður pipar
2 msk. olía

Aðferð:

Kryddið hreindýravöðva með salti og pipar og steikið upp úr olíu á vel heitri pönnu í 2-3 mínútur á hvorri hlið eða þangað til kjötið er orðið fallega brúnt á öllum hliðum. Setjið kjötið í ofnskúffu og inn í 180°C heitan ofn í 10 mínútur. Takið þá kjötið úr ofninum og látið standa í 5 mínútur. Setjið kjötið aftur inn í ofninn í 10 mínútur, takið það svo út og látið standa í 5-10 mínútur áður en það er borið fram með púrtvínssósunni og t.d. steiktum kartöflum og grænmeti.

Púrtvínssósa

3 msk. olía
1 laukur, smátt saxaður
5 sveppir, smátt saxaðir
1 tsk. tómatmauk
1 timíangrein
1 lárviðarlauf
2 dl púrtvín eða madeira
2 msk. balsamedik
4 dl hreindýrasoð
sósujafnari
30 g kalt smjör í teningum
salt og nýmalaður pipar

Aðferð:

Hitið olíu í potti og látið lauk og sveppi krauma í 2 mínútur án þess að brúnast. Bætið tómatmauki, timíangrein, lárviðarlaufi, balsamediki og púrtvíni í pottinn og sjóðið niður um þriðjung. Hellið hreindýrasoði í pottinn og þykkið með sósujafnara.

Takið pottinn af hellunni og hrærið smjör saman við þar til það er bráðnað. Eftir það má sósan ekki sjóða. Smakkið sósuna til með salti og pipar.

Úlfar Finnbjörnsson matreiðslumeistari.
Mynd: islandshotel.is

Efsta mynd úr villibráðabók Úlfars, sjá nánar hér og höfundur á uppskrift er Úlfar Finnbjörnsson matreiðslumeistari.