Fyrsti Icelandic Lamb skjöldurinn settur upp á veitingastað í Japan

Guðlaugur Þór Þórðarson, utanríkisráðherra Íslands, setti upp fyrsta Icelandic Lamb skjöldinn á Yuki Daruma, en hann var á dögunum í opinberri heimsókn til Japan.

Markaðsstofan Icelandic lamb hefur undanfarin misseri unnið að markaðssetningu á íslensku lambakjöti í Japan í samvinnu við kjötútflytjendur og japanska innflutningsfyrirtækið Global Vision. Fyrirtækið flytur inn ýmsar sérvörur til Japans frá Evrópu og Norður Ameríku og selur til veitingastaða, svæðisbundinna dreifingaraðila og sérverslana. Íslenskt lamba- og hrossakjöt er það nýjasta í vörulínu japanska fyrirtækisins sem hefur lagt töluvert undir við markaðssetningu á íslenskum afurðum. Nú þegar er íslenskt lambakjöt komið á matseðla um 100 veitingastaða í Japan og fæst auk þess í völdum verslunum. Í verkefninu er horft til næstu fimm ára en hingað til hefur sala verið afar góð og líkur á aukinni markaðshlutdeild á næstu árum. Sala undir hatti verkefnisins nam um 200 tonnum í fyrra.

Erlendir ferðamenn og sérverkefni í útlöndum

Í fréttatilkynningu segir að helsta verkefni markaðsstofunnar Icelandic lamb snýr að því að kynna íslenskt lambakjöt og aðrar sauðfjárafurðir fyrir erlendum ferðamönnum á Íslandi. Þegar hefur verið komið á samstarfi við um 160 aðila í veitingarekstri, framleiðslu, hönnun og nýsköpun. Þar af eru um 120 íslenskir veitingastaðir í samstarfi um að setja lambakjöt í öndvegi. Að auki vinnur markaðsstofan að sérstökum útflutningsverkefnum.

Svavar Halldórsson, framkvæmdastjóri Icelandic Lamb og Guðlaugur Þór Þórðarson, utanríkisráðherra Íslands

Samstarf við japanskan sérvöru innflytjenda

Icelandic lamb og Global Vision gerðu með sér samstarfssamning 2017 sem gerir ráð fyrir stigvaxandi markaðshlutdeild íslenska lambakjötsins á Japansmarkaði. Í honum felst einnig að allt markaðsefni Icelandic lamb sé þýtt á japönsku, sett verði upp japönsk heimasíða og samvinna um markaðsefnis fyrir samfélagsmiða. Ráðist verður í samfélagsmiðlaherferð í Japan síðar á þessu ári. Að sögn Svavars Halldórssonar, framkvæmdastjóra Icelandic Lamb, hefur stuðningur utanríkisráðuneytisins og sendiráðsins í Japans verið ómetanlegur við að koma verkefninu af stað.

Vöruþróun vegna sérstakra japanskra rétta

Sölunni á íslenska lambakjötinu má einkum skipta í tvo megin hluta. Annars vegar eru fluttir út dýrari bitar á góðu verði sem fara til veitingastaða og sérverslana. Hins vegar eru fluttir út feitir frampartar sem fara á veitingastaði sem sérhæfa sig í mongólsku grilli eða Ghengis Khan. Einnig fór af stað í ár vöruþróunarverkefni á sérstökum lambakjötsrúllum úr íslensku lambakjöti sem m.a. eru nýttar í japanska rétti eins og Shabu Shabu. Í báðum tilfellum elda viðskiptavinir réttina sjálfir við borðið og íslenskt lambakjöt þykir hafa sérstaka eiginleika sem nýtast vel á þessari tegund veitingastaða.

Samningurinn er gerður við veitingastaðinn Yuki Daruma í Tókýó en nafnið þýðir snjókarl og eigandi staðarins er fyrrum frægur súmó-glímukappi. Staðurinn er einn af þekkustu veitingarstöðum Tókýóborgar sem bjóða upp á mongólskt grill. Staðurinn er sérstaklega þekktur fyrir að veggir hans eru þaktir eiginhandaráritunum frægra íþróttamanna og leikara.

Fyrsti formlegi samstarfs-veitingastaðurinn utan Íslands

Á dögunum var skrifað undir fyrsta formlega samstarfssamning Icelandic Lamb við veitingastað erlendis. Samningurinn er gerður við veitingastaðinn Yuki Daruma í Tókýó en nafnið þýðir snjókarl og eigandi staðarins er fyrrum frægur súmó-glímukappi. Staðurinn er einn af þekkustu veitingarstöðum Tókýóborgar sem bjóða upp á mongólskt grill. Staðurinn er sérstaklega þekktur fyrir að veggir hans eru þaktir eiginhandaráritunum frægra íþróttamanna og leikara. Guðlaugur Þór Þórðarson, utanríkisráðherra Íslands, setti upp fyrsta Icelandic Lamb skjöldinn á Yuki Daruma, en hann var á dögunum í opinberri heimsókn til Japan. Fimmtán aðrir veitingastaðir hafa þegar óskað eftir því að gera sambærilegan samstarfssamning og skuldbinda sig um leið til þess að bjóða eingöngu upp á íslenskt lambakjöt og hafa það ávallt á matseðli. Að auki verða fljótlega opnaðir þrír mongólskir grillstaðir til viðbótar sem munu sérhæfa sig í íslensku lambakjöti en þess má geta að ekkert annað kjöt verður á matseðli.

Myndir: aðsendar