Fyrsta heildstæða kennsluefnið í matreiðslu gefið út eftir 70 ára kennslusögu – Myndir frá útgáfuteitinu

Höfundar bókarinnar eru Hermann Þór Marinósson, Hinrik Carl Ellertsson, Ragnar Wessman og Ægir Friðriksson

Föstudaginn síðastliðinn var sögulegur dagur í íslenskri matreiðslusögu, þegar ný matreiðslubók var formlega gefin út á vegum Iðnú.

Sjá einnig: Ný vefbók fyrir matvælakennslu og áhugafólk um matreiðslu

Bókin markar mikilvæg tímamót í framvindu matreiðslumenntunar á Íslandi, þar sem hún er fyrsta heildstæða kennsluefnið sem gefið hefur verið út í matreiðslu. Það er hreint ótrúlegt að slíkt hafi ekki gerst fyrr, í ljósi þess að matreiðsla hefur verið kennd hér á landi í yfir 70 ár.

Höfundar bókarinnar eru Hermann Þór Marinósson, Hinrik Carl Ellertsson, Ragnar Wessman og Ægir Friðriksson. Allir eru þeir landsþekktir matreiðslumenn og kennarar með áratuga reynslu. Samstarf þessara meistara hefur leitt af sér framúrskarandi útgáfu sem miðar að því að gera námið bæði faglegra og aðgengilegra fyrir komandi kynslóðir matreiðslumanna.

Um bókina

Hin nýja bók fjallar um allar hliðar matreiðslu, frá grunnatriðum og tækni til val á gæða hráefni og mikil áhersla er lögð á íslenskt hráefni. Sérstök áhersla er lögð á jafnvægi milli fræðilegrar útskýringar og nákvæm aðferðafræði, sem gerir bókina að ómissandi verkfæri fyrir bæði nemendur og fagfólk.

Samkvæmt Hermanni Þór Marinóssyni er bókin hönnuð þannig að hún nýtist ekki aðeins sem kennslubók heldur einnig sem uppflettirit fyrir fagmenn í atvinnulífinu. Hinrik Carl Ellertsson tekur undir þetta og lýsir gleði sinni yfir samstarfinu við hina höfunda bókarinnar.

Bókina má nálgast á stafrænu formi í gegnum vefsíðuna vefbok.is, þar sem nemendur, fagmenn, almenningur og kennarar geta haft aðgang að efninu á einfaldan og þægilegan hátt.

Útgáfuhófið

Útgáfuhófið fór fram í Hótel og matvælaskólanum í MK og var vel sótt af nemendum, kennurum og fagfólki úr matreiðslugeiranum. Viðburðurinn var haldinn í hátíðlegum anda, þar sem gestir fengu tækifæri til að skoða bókina, hlýða á ávörp höfunda og njóta léttara veitinga. Stemningin var einstaklega góð og endurspeglaði þakklæti og spenning yfir þessu mikilvæga framtaki.

Með þessari bók er stigið stórt skref í að efla matreiðslumenntun á Íslandi og styrkja stöðu hennar sem lykilþáttar í íslenskri menningu og atvinnulífi. Það er von höfunda að hún verði ómetanlegur stuðningur við alla þá sem leggja stund á matreiðslu, hvort sem það eru byrjendur eða reyndir fagmenn.

Myndir: aðsendar