Finnar auka lífslíkur sínar með minni saltneyslu

Sænskir næringarfræðingar hafa áhyggjur af saltneyslu þjóðarinnar sem er að meðaltali um 12 til 13 grömm á dag og horfa öfundaraugum til nágranna sinna í Finnlandi þar sem saltneysla hefur verið helminguð á síðast liðnum 30 árum, úr 14 niður í 8 grömm.

Finnar þakka heilbrigðisátaki og herferð þennan árangur og hafa reiknað út að hættan á heilablóðfalli og hjartabilun hafi minnkað um 75 til 80% hjá fólki yngra en 65 ára.

Á vefsíðu Lýðheilsustöðvar má finna könnun Manneldisráðs Íslands um mataræði Íslendinga frá 2002 og þar kemur fram að Íslendingar neyta að meðaltali um 8,9 gramma af salti á dag. En sú tala er nefnd með þeim fyrirvara að hún mæli til dæmis ekki það salt sem stráð er út á mat eftir að hann hefur verið eldaður og telja höfundar skýrslunnar að raunveruleg saltneysla Íslendinga sé hærri en þessi tala ber vott um.

Í Svenska Dagbladet kemur fram að finnski blóðþrýstingurinn hafi lækkað til muna og samkvæmt nýjustu rannsóknum mun sá árangur hafa bætt sex árum við lífslíkur landsmanna.

Greint frá á heimasíðu Mbl.is

[email protected]