Fannar opnar fyrirtækja,- & veisluþjónustu

Fannar Arnarsson

Matar Kompaníið opnaði fyrir um tveimur mánuðum síðan og hefur verið mikill uppgangur hjá fyrirtækinu. Það er Fannar Arnarsson og fjölskylda hans sem eru eigendur Matar Kompanísins sem staðsett er við Helluhraun 22 í Hafnarfirði.

Fannar tók smá flakk í lærdóminum, en hann lærði fræðin sín á veitingastaðnum Við Tjörnina, fór svo yfir á Hilton Hótel, tók sér smá pásu og kláraði síðan samninginn á Grand hótel og útskrifaðist sem matreiðslumaður í fyrra.

Matar Kompaníið býður fyrirtækjum að fá sendan mat beint á vinnustaðinn þar sem boðið er upp á holla, matmikla og fjölbreytta rétti ásamt því að bjóða upp á alhliða veisluþjónustu. Með Fannari til halds og traust er matreiðslumaðurinn Guðmundur Óli Sigurjónsson, en hann kláraði núna síðustu vaktir sínar í Perlunni og byrjaði 100% vinnu hjá Matar Kompaníinu um mánaðarmótin s.l.

Fréttamaður veitingageirans kíkti á þá félaga Fannar og Guðmund nú á dögunum, en þeir voru þá í óða önn að gera klárt fyrir veislur og preppa fyrir næsta dag. Það var gott hljóðið í þeim og var vikan vel pöntuð og nóg að gera framundan, virkilega gaman þegar gengur vel hjá fyrirtækjum.

Látum hér nokkrar myndir frá fyrirtækja- & veisluþjónustu Matar Kompanísins fylgja með.

Myndir: facebook / Matar Kompaní

Heimasíða: www.matarkompani.is