Dímon 11: Nýr gastropub opnar á Laugavegi 11

Á Laugavegi bætist nú við nýr og metnaðarfullur veitingastaður: Dímon 11 Gastropub, sem opnaði formlega laugardaginn 12. júlí. Staðurinn leggur áherslu á bragðmikla matargerð og afslappaða, persónulega stemningu.

Að rekstrinum standa tvö vel þekkt og reynslumikil hjón: Ívar Þórðarson, matreiðslumeistari, og eiginkona hans Sigríður Pálsdóttir, ásamt Tómasi Kristjánssyni, framreiðslumanni, og Sigrúnu Guðmundsdóttur, framreiðslumeistara.

Nafnið Dímon 11 er tvíþætt í merkingu: Talan vísar til staðsetningarinnar á Laugavegi 11, en orðið Dímon er einnig tilvísun í tvö samliggjandi fjöll – táknrænt fyrir þau tvö hjón sem standa sameiginlega að rekstrinum.

Frá street food yfir í reykta rétti

Staðurinn skilgreinir sig sem gastropub og býður upp á casual, stílhreina og örlítið rustic stemningu þar sem hráefni, eldunartækni og hugmyndir mætast af alúð og næmni. Á matseðli má finna allt frá götumat á borð við smáborgara, rif, franskar og smælki með ýmsum útfærslum, yfir í fiskrétti, súpur og samlokur. Í eldhúsinu má finna bæði grill og reykofn, sem munu setja mark sitt á bragð og útfærslu rétta.

Eigendur leggja ríka áherslu á íslenskar tengingar í hráefni og nálgun, án þess þó að festa sig við ákveðna þjóðareldamennsku – hugmyndafræðin að baki gastropub hugtakinu fái þar að njóta sín í sínu víðasta samhengi.

Bjór á krana og íslenskt á flöskum

Drykkjarseðillinn endurspeglar sömu hugmyndafræði og matseðillinn – fjölbreytni, gæði og íslenskar tengingar. Í samstarfi við Ölvisholt er boðið upp á sjö tegundir af bjór á krana, auk léttvína og úrvals íslensks áfengis. Áhersla er lögð á fjölbreytt úrval, góða samsetningu og drykki sem falla vel að matseðlinum.

Stemning sem byggir á jafnvægi og nálægð

Í upphafi verður Dímon 11 opinn daglega frá kl. 16:00, með eldhúsið opið til kl. 22:00. Þótt engin formleg kvölddagskrá sé á dagskrá, eru eigendur opnir fyrir lifandi tónlist og viðburðum þegar líður á haustið.

Þjónustustíllinn er afslappaður og persónulegur, og verðlagning í hóflegu meðallagi – þannig að bæði heimafólk og ferðamenn geti notið góðrar máltíðar við notalegar aðstæður.

Dímon 11 Gastropub opnaði formlega laugardaginn 12. júlí og tekur nú á móti gestum í hjarta borgarinnar – með angan úr reykofni, kraftmikla bjóra og íslenska gestrisni í fyrirrúmi.

Myndir: aðsendar