Bragðmikil djöflaegg með beikoni og sýrðum rjóma

Djöflaegg eru að mínu mati stórlega vanmetinn partýmatur og þyrftu að vera mikið oftar á borðum. Þau eru frábær með köldum drykk og þar að auku hollt og gott snarl, sem hentar til dæmis afar vel á lágkolvetna eða ketó mataræði. Mér þykir einnig ákaflega lekkert að bera svona egg fram á bröns hlaðborðinu.

6 stór egg

4 vænar sneiðar beikon

4 litlir vorlaukar, smátt saxaðir

1 msk Dijon sinnep

Nokkrir dropar Tabasco sósa

4 msk 18% sýrður rjómi frá Gott í matinn

Salt og pipar

Paprikuduft og fersk steinselja eftir smekk

Aðferð:

1. Sjóðið eggin í 10 mínútur eða þar til harðsoðin. Steikið beikonið á meðan þar til stökkt, setjið á bréf og látið kólna.
2. Kælið eggin undir rennandi vatni, takið skurnina af og skerið eggin í tvennt. Skafið eggjarauðuna innan úr og setjið í skál eða matvinnsluvél.
3. Blandið ¾ af vorlauknum saman við eggjarauðurnar ásamt, sinnepi, tabasco, sýrðum rjóma, salti og pipar. Blandið vel saman þar til blandan er silkimjúk. Smakkið ykkur áfram með salti og pipar og e.t.v. tabasco sósu.
4. Setjið eggjablönduna í sprautupoka og sprautið í eggjahelmingana. Þetta má líka gera með skeið og sleppa sprautupokanum.
5. Skreytið eggin með dáliltu paprikudufti, smátt söxuðu beikoni, vorlauk og steinselju. Berið fram strax eða geymið í kæli.