BragðaGarður 2025: „Ég lærði að vera öruggari og tala við alls konar fólk“ – Myndir

Það var líf og fjör í Grasagarðinum í Reykjavík þegar BragðaGarður fór fram dagana 26.–27. september. Hátíðin, sem er haldin af Slow Food á Íslandi í samstarfi við Grasagarðinn og Hótel- og matælaskólann í MK í Kópavogi, fagnaði matarmenningu og sjálfbærni með fjölbreyttri dagskrá fyrir alla aldurshópa.

Á föstudeginum mættu 220 gestir til að taka þátt í dagskrá sem var sérstaklega sniðin að ungu fólki. Nemendur á fyrsta ári í matreiðslu voru með sýnikennslu á einföldum réttum úr íslensku hráefni og nemendur úr Grunndeild matvæla í MK stýrðu jafningjafræðslu og sýndu gestum hvað þau hafa verið að læra í náminu. Það voru skynmatsverkstæði, jurtakokteilbar, kynningar á súrdeigsbrauði og sýnikennsla í matreiðslu og stemningin var frábær.

Hinrik og Emma hrista jurtakokteila í BragðaGarði í Grasagarðinum.

Tveir nemendur, Hinrik og Emma, tóku þátt í verkefninu og sögðu frá reynslu sinni og þátttöku.

Hvað fannst ykkur skemmtilegast við að taka þátt?

Hinrik: „Að framreiða drykkina og skoða allskonar hlutina sem komu fram þarna.“
Emma: „Allt var svo skemmtilegt! Við fengum öll að vera saman og sýna fólki hvað við höfðum verið að læra.“

Hvað lærðuð þið af deginum?

Hinrik: „Hversu mikinn áhuga fólk getur haft á svona verkefni.“
Emma: „Ég lærði að vinna betur með öllum, tala við alls konar fólk og vera öruggari.“

Mynduð þið vilja taka þátt í fleiri svona verkefnum?

Hinrik: „Já, ég myndi vera til í það, þó ég sé ekki með miklar hugmyndir.“
Emma: „100%! Mér finnst skemmtileg hugmynd að halda litla matarhátíð með básum, bakarar með kökur og brauð, kjötvinnslunemar með kjötspjót, þjónar með drykki og matreiðslunemar með míni-rétti. Eitthvað fyrir góðgerðarmál væri líka gaman.“

Hvernig er að vera í Grunndeild matvæla í MK?

Hinrik: „Það er bara æðislegt, ég finn að ég á að vera hérna.“
Emma: „Það er geggjað! Kennararnir eru yndislegir og við fáum að prófa allt, kjötið, þjóninn, bakarann og kokkinn. Ég bíð spennt eftir hverjum verklegum degi!“

Á laugardeginum mættu 830 gestir á matarmarkað Beint frá Býli og Samtaka smáframleiðenda matvæla. Þar var boðið upp á fjölbreyttar afurðir og líflega stemningu. Fyrirlestrar dagsins voru vel sóttir og sköpuðu áhugaverðar umræður um matarmenningu, sóun og súðbyrðinga og gestir tóku virkan þátt.

BragðaGarður sýndi vel hvernig hægt er að tengja saman mat, menntun og samfélagsvitund og það er ljóst að framtíðin er bragðmeiri með svona kröftugu og áhugasömu unga fólki.

Myndir: Slow Food