Á fjórða hundrað manns sóttu Bransadaga Iðunnar – Myndaveisla

Á fjórða hundrað manns sóttu Bransadaga Iðunnar sem haldnir voru dagana 14. – 16. maí og voru helgaðir nýsköpun í iðnaði í ár.

Í tilefni Bransadaga var opnaður Pop-up veitingastaður og vínstofa í húsakynnum Iðunnar og vakti þetta framtak Matvæla og veitingasviðs mikla lukku.

Gestir fengu að kynnast nýsköpun í matreiðslu en ein af stærstu áskorunum framtíðar er að bjóða upp á prótín sem hefur ekki neikvæð áhrif á loftslag og náttúru. Björn V. Aðalbjörnsson frá Loka Food kynnti fisk úr plöntupróteinum í samvinnu við náttúrkokkinn Hinrik Carl Ellertsson.

Ólöf Ólafsdóttir og Hugi Rafn landsliðskokkar léku listir sínar og sýndu meistaratakta í matreiðslu eftirrétta með þrívíddarprentuðum eftirréttarformum, óhætt er að segja að eftirréttirnir hafi slegið í gegn sem einstök matarupplifun.

Gísli Grímsson einn af stofnendum Rætur&Vín opnaði litla vínstofu við hlið Pop-up veitingastaðarins og kynnti náttúruvín án allra aukaefna sem hafa notið mikilla vinsælda undanfarin ár.

Strákarnir í Flóra sáu svo um veitingar í loka partíinu, glæsilegan fingramat mat sem rann ljúft niður með bjórnum frá Litla Brugghúsinu.

Fyrir utan var svo sett um al íslenskt gróðurhús frá Bamba hús, en það merkilega við þessi hús er að þau eru gerð úr endurunnum 1000L IBC tanka sem í daglegu tali eru kallaðir Bambar. Húsið mun standa áfram fyrir utan höfuðstöðvar Iðunnar að vatnagörðum 20 og í boði verður að koma og kynna sér húsið og jafnframt að koma með tillögur að ræktun hvort sem er í tilraunaskyni eða fyrir einstök verkefni.

Uppsetningin að gróðurhúsinu er svo hluti af stærra verkefni sem kallað verður „Blómlegt iðnaðarhverfi“ sem kynnt verður fljótlega.

Það má því segja að Bransadagar og nýsköpun hafi farið fram úr björtustu vonum starfsmanna Iðunnar Fræðslusetur.

Meðfylgjandi myndir tók Sigurjón Ragnar ljósmyndari.