Allt um notkun Skráargatsins við markaðssetningu matvæla

Með nýjum reglum um notkun á norræna Skráargatsmerkinu verður auðveldara fyrir neytendur að velja holl matvæli. Þann 26. mars tók ný Skráargatsreglugerð gildi hér á landi með breyttum skilyrðum fyrir notkun á merkinu. Tilgangur breytinganna er að auka fjölbreytni og framboð af jurtaafurðum og hollum tilbúnum réttum sem má merkja með Skráargatinu, að því er fram kemur á heimasíðu Matvælastofnun.

Með því að auka hlutdeild jurtaafurða verður máltíðin „grænni“ og stigin skref í átt að aukinni sjálfbærni. Breytingarnar gefa aukinn sveigjanleika og möguleika á vöruþróun. Með nýju reglugerðinni er hægt að skipta út hluta af kornvörum fyrir grænmeti og belgjurtir í brauði og pasta. Að auki geta heilkorn, grænmeti og belgjurtir komið í stað hluta kjötsins í kjötvörum.

Tími til að elda hollan mat er oft knappur í daglegu amstri og því hafa neytendur tekið fegins hendi ýmsum tilbúnum réttum. Reglur varðandi Skráargatsmerkingu tilbúinna rétta hafa hins vegar verið fremur flóknar og takmarkað möguleika á að nota merkið. Nýju reglurnar eru einfaldari og er vonast til að það muni leiða til aukins framboðs á hollum tilbúnum réttum með Skráargatsmerkinu.

Í nýju reglugerðinni er einnig gerð breyting á merkinu sjálfu þannig að táknið ®, sem táknar skrásett vörumerki, verður ekki lengur hluti af Skráargatsmerkinu. Hægt verður að merkja vörur með Skráargatinu ásamt tákninu ® fram til 1. september 2024 og mega þær vera á markaði þar til birgðir eru uppurnar.

Mynd: www.skraargat.is