Vitinn í Sandgerði kominn á fertugsaldurinn og eflist enn

Vitinn í Sandgerði var byggður árið 1982 af þeim hjónum Stefáni Sigurðssyni matreiðslumeistara og konu hans Brynhildi Kristjánsdóttur og hafa þau rekið staðinn síðan.

Kjörorð Vitans hefur alla tíð verið:

Í matreiðslu, eins og í öllum listgreinum, er einfaldleikinn merki fullkomnunar

Við félagarnir áttum leið um Sandgerði um daginn á fund og var sannmælst um að hittast í Vitanum og snæða hádegisverð.

Það sem við fengum kemur hér:

Brauð

Fyrst kom brauð sem var bakað á staðnum, volgt og með íslensku smjöri.

Rjómalöguð Krabbasúpa með hörpuskel, rækjum, krækling og kúskel

Þetta var ein sú kröftugasta súpa sem ég hef smakkað og hrein og klár ánægja að borða hana.

Svo kom aðalrétturinn:

Heilsteikt rauðspretta með smjörsteiktu rótargrænmeti, Rösti kartöflum og Tartarsósu

Og þvílíkt sælgæti, bragðið af rauðsprettunni fannst vel, því ekki var ofkryddað, grænmetið stóð fyrir sínu, en mikið hefði ég viljað skipta á kartöflum og fá soðnar kartöflur og helst í hýði með, tartarsósan var alvöru.

Svo kláruðum við fundinn þökkuðum vertinum fyrir viðurgjörninginn og héldum tilbaka til Reykjavíkur.

/Sverrir