Vel heppnaður styrktarkvöldverður hjá Kokkalandsliðinu

Við félagarnir mættum um 7 leitið í fordrykk þar sem Hendricks Gin og Reyka Vodka voru í fyrirrúmi. Það var margt um gestinn og fólk var mjög áhugasamt um matinn. Við fengum okkur tvo fordrykki og gott spjall áður en við settumst með virkilega skemmtilegu fólki.

Í byrjun kvöldsins kynntu þeir Hafliði Halldórsson forseti Klúbbs Matreiðslumeistara og Hákon Már Örvarsson sérstakur framkvæmdastjóri kokkalandsliðsins fyrir gestum starfsemi kokkalandsliðsins, þar sem Hafliði kynnti nýtt auðkennismerki landsliðsins. Svo kynnti Hákon fyrir okkur matseðilinn ásamt því að kynna okkur fyrir meðlimum landsliðsins. Við vorum spenntir.

Steinsbítskinnar hægeldaðar í kryddjurtaolíu með jarðskokkum, stökku brauði og fáfnisbrauði.
Vín: Faustino VII Blanco

Virkilega góðar steinbítskinnar og estragonið var mjög áberandi.

Grafinn lax og hörpuskel með skelfiskssósu, spergilkáli, byggi, dilli, og hrognum.
Vín: Villa Lucia Pinot Grigio

Góður réttur þar sem laxinn var létt grafinn og hörpuskelin reykt.

Epla og seljurótarseyði, borið fram með vatnakarsa og heslihnetum.

Góð samsetning á bragði. En í öllum keppnum þarf að vanda skurð.

Lambahryggsvöðvi og -tunga með lambasoðsgljáa ásamt kartöflusmælki, villtum sveppum, sýrðum laukum, bakaðri gulrót og sítrónublóðbergi.
Vín: Villa Arvedi Amarone

Lambið var vel eldað og tungan æðisleg. Æðislegt að fá villisveppi!

Skyr frá Erpsstöðum og birki-brioche með hvítsúkkulaði, rabarbara og hnetusmjöri.
Vín: Morande Late Harvest Sauvignon Blanc

Eftirrétturinn var æðislegur þar sem sorbetinn var virkilega ferskur, rabarbarinn var örlítið stökkur en þó nægilega eldaður til að losna við tæjurnar og Makkarónurnar, ég segi eitt: ,,Pay attention”, þessar makkarónur minntu á Pierre Herme.

Fleiri myndir frá styrktarkvöldverðinum verða birtar síðar.

/Ágúst