Ainsley Harriott eldaði fyrir gesti Kaffivagnsins | Fréttamaður veitingageirans fékk sér fiskibollur að hætti Gumma og Harriott

Guðmundur Viðarsson, Mjöll Daníelsdóttir og Ainsley Harriott

Hinn þekkti breski sjónvarpskokkur Ainsley Harriott eldaði fyrir gesti Kaffivagnsins í einu hádeginu þar í lok febrúar s.l., en hann var staddur hér á landi til þess að taka upp þátt sinn Ainsley Eats the Streets auk þess sem hann dæmdi í Food&Fun keppninni.

Ainsley Harriott tók upp efni fyrir nýjasta sjónvarpsþátt sinn Ainsley Eats the Streets. Vildi elda hefðbundinn íslenskan mat á gömlum og grónum veitingastað

Harriott vildi finna gamlan og rótgróinn veitingastað þar sem hann gæti eldað hefðbundinn íslenskan mat. Höfðu starfsmenn hans samband við eigendur Kaffivagnsins, kokkinn Guðmund Viðarsson og eiginkonu hans Mjöll Daníelsdóttur, þar sem þeim fannst Kaffivagninn passa vel við þessa lýsingu.

Að sögn Mjallar var ákveðið að Harriott myndi elda fiskibollur eins og Guðmundur er vanur að reiða fram í tugatali á hverjum degi en því næst myndi Harriott sýna starfsfólkinu, og sjónvarpsáhorfendum þegar þar að kemur, hvað hann myndi búa til með nákvæmlega sama hráefni í höndunum.

Ainsley er afskaplega viðkunnanlegur, kom með bros á vör og var frábær í eldhúsinu. Hann lærði af okkur hvernig á að gera fiskibollur og saltfiskklatta og þegar það kom að honum að skapa eitthvað úr sama hráefni þá gerði hann ekki miklar breytingar þar sem honum fannst allt passa svo vel saman í þessari samsetningu okkar.

, sagði Mjöll Daníelsdóttir.

Svo mikið var að gera á Kaffivagninum um og eftir hádegi að eftir að tökum lauk á sjónvarpsþættinum vatt Harriott sér inn í eldhús og hjálpaði Guðmundi í fiskibollugerðinni.

Ainsley vakti mikla athygli gesta Kaffivagnsins sem áttu síst von á að hitta frægan sjónvarpskokk þegar þeir gengu hérna inn, sérstaklega voru erlendu ferðamennirnir uppveðraðir af veru hans hér og töluðu sumir þeirra um að þessum fiskibollum munu þeir sko aldrei gleyma

, sagði Mjöll enn fremur.

Í þáttunum Ainsley Eats the Streets ferðast Harriott um heiminn og kynnist matarmenningu ólíkra borga. Hann heimsækir litla götuveitingastaði og kynnir sér matarvenjur heimamanna. Harriott er þekktur sjónvarpskokkur í Bretlandi, en þættir hans Ready Steady Cook og Can’t Cook, Won’t Cook hafa notið mikilla vinsælda.

Guðmundur og Mjöll festu kaup á Kaffivagninum fyrir nokkrum mánuðum síðan og hafa smám saman verið að gera breytingar á bæði innanstokksmunum og matseðli staðarins, án þess þó að breyta því sem hefur gert Kaffivagninn að vinsælum áfangastað Reykvíkinga í áratugi.

Veitingageirinn.is var á staðnum:

Spergilsúpa með volgu brauði

Og að sjálfsögðu var veitingageirinn á svæðinu og smakkaði á herlegheitunum, fékk mér fyrst Spergilsúpu með volgu brauði og var hún svakalega góð.

Fiskibollur að hætti Gumma og Harriott

Svo kom aðaldæmið sem var fiskibollur að hætti Gumma og Harriott og var þar á ferðinni klassískur réttur framreiddur á nútíma máta og ekki varð maður fyrir vonbrigðum með þennan rétt.

Gaman var að fylgjast með Harriott, hversu alþýðulegur hann var og léttur í lund, þannig að það geislaði frá honum í allar áttir.

Fór sáttur út og ánægður hvað Kaffivagninn er í stórsókn í aðsókn sem hann á skilið.

Myndir á bakvið tjöldin tók Mjöll Daníelsdóttir og eru birtar hér með góðfúslegur leyfi hennar.

/Sverrir