Þessir fagmenn dæma Eftirrétt ársins og Konfektmola ársins

Mynd: garri.is

Þriðjudaginn 28. október stendur Garri fyrir árlegu sælkera­hátíðinni þar sem keppt verður í Eftirrétti ársins og Konfektmola ársins. Keppnin fer fram á veitingastaðnum La Primavera í Hörpu þar sem fagmenn fá að njóta sín í skapandi og krefjandi umhverfi.

Alls kynna 27 keppendur eftirrétti fyrir dómurum og tíu keppendur skila sínum konfektmolum til mats dómnefndar. Keppnin hefst klukkan 8:30 og fyrsti keppandinn skilar diski klukkan 8:50. Þarna gefst einstakt tækifæri til að fylgjast með hæfileikaríku fagfólki í skapandi og krefjandi umhverfi þar sem fagmennska og hugmyndaflug ráða ferðinni.

Í keppninni er dæmt eftir fimm matsatriðum: Uppskriftaskil og skýrleika (10%), þar sem nákvæmni og greinargóð vinnulýsing skiptir máli; samsetningu innihaldsefna og tengingu við þema (25%); bragði og áferð (35%); framsetningu og nýsköpun (20%); og loks faglegt vinnubragð, hreinlæti og skipulagi (10%).

Dómarar í Eftirrétt ársins

Snædís Xyza Mae Jónsdóttir landsliðsþjálfari.
Mynd: Ruth Ásgeirsdóttir

Yfirdómari í Eftirréttur ársins

Snædís Xyza Mae Jónsdóttir er matreiðslumeistari og þjálfari íslenska Kokkalandsliðsins. Hún er í dag yfirkokkur á Fröken Reykjavík, Hótel Reykjavík Saga. Snædís hefur mikla keppnisreynslu og unnið fjölda verðlauna, meðal annars Eftirréttur ársins árið 2018, Arctic Chef, og gull í heita á World Cup Luxembourg 2018. Snædís hefur keppt og sigrað með Kokkalandsliðinu sem náði til dæmis frábærum árangri á Ólympíuleikunum í matreiðslu 2020 og árið 2024.

Hinrik Örn Lárusson
Mynd: Progastro

Hinrik Örn Lárusson er margverðlaunaður matreiðslumaður, frumkvöðull og veitingamaður sem hefur markað sér sterk spor í íslenskri matargerð. Hann hefur unnið titilinn Ungkokkur Íslands tvisvar og hlotið silfur á Ungkokkur Norðurlanda tvívegis. Hinrik var Matreiðslumaður ársins 2024 og Matreiðslumaður Norður-Evrópu 2025. Hann keppti sem commis með Viktori í Bocuse d’Or 2017, þar sem þeir unnu brons. Hinrik er næsti keppandi Íslands í Bocuse d‘Or. Hinrik er stofnandi og eigandi Lux veitinga, Sælkerabúðarinnar, Sælkeramatar og Asks, og undirbýr nú opnun nýs staðar, Brasa, í Kópavogi.

Sigurjón Bragi Geirsson
Mynd: Bocusedor.com

Sigurjón Bragi Geirsson er matreiðslumeistari og yfirkokkur hjá Flóru veisluþjónustu. Sigurjón lærði á Hótel Borg á árunum 2007–2010 en síðan þá hefur hann starfað á fjölmörgum veitingastöðum og tekið virkan þátt í keppnum bæði hérlendis og erlendis. Hann keppti með Kokkalandsliði Íslands 2017–2020 og var þjálfari liðsins, sem vann til bronsverðlauna á Ólympíuleikum í Stuttgart. Sigurjón hlaut titilinn Kokkur ársins árið 2019 og keppti í Bocuse d’Or, þar sem hann náði 5. sæti í Evrópu og 8. sæti í aðalkeppninni í Lyon 2023.

Dómarar í Konfektmola ársins

Ásgeir Sandholt.
Mynd: sandholt.is

Ásgeir Sandholt er fjórði ættliður bakara í hinu rómaða Sandholt bakaríi. Hann hefur unnið þar frá unga aldri og byggt upp einstakan feril sem konditori. Ásgeir lærði í Danmörku og útskrifaðist frá RTH Ringsted árið 1999. Hann hefur unnið til fjölda verðlauna, þar á meðal Eftirréttur ársins árið 2017, auk fjölda gullverðlauna á alþjóðlegum mótum. Ásgeir er þekktur fyrir sköpunargleði, fagmennsku og ástríðu fyrir gæðahráefni, og hefur kennt og miðlað þekkingu til fjölda fagmanna hérlendis og erlendis.

Axel Þorsteinsson.
Mynd: úr einkasafni / Axel Þorsteinsson

Axel Þorsteinsson er bakari, konditor og frumkvöðull með yfir tuttugu ára alþjóðlega reynslu. Hann hefur starfað víða um heim, meðal annars í Miðausturlöndum, London, Mílanó og New York. Axel hefur tekið þátt í fjölda keppna með góðum árangri, bæði á Íslandi, í Evrópu og í Dubai. Axel sigraði í Eftirréttur ársins árið 2015. Í dag er Axel eigandi Hygge Coffee & Micro Bakery, þar sem hann sameinar handverk, gæði og nútímalega sýn í notalegu umhverfi.

Þetta er viðburður sem enginn sælkeri ætti að láta fram hjá sér fara.