Stefan Ekengren opnar kaffihús í miðborg Stokkhólms með áherslu á að brauð sé bakað af faglærðum kokkum

Við hliðina á veitingastaðnum Hantverket við Sturegatan 15 í Stokkhólmi hefur sænski matreiðslumaðurinn Stefan Ekengren opnað nýtt smáréttakaffihús undir nafninu Eken Bageri & Kökscafé.

Í tilkynningu frá Eken kemur fram að lögð er áhersla á að brauð sé bakað af faglærðum kokkum og matseðil sem mótaður er af fagmennsku eldhússins fremur en hefðbundinni kaffihúsamenningu.

Eken hefur verið byggt upp frá grunni í húsnæði sem áður hýsti aðra starfsemi og er innréttað með það að markmiði að skapa hlýlegt og opið andrúmsloft. Hugmyndafræðin sækir innblástur í klassíska miðevrópska kaffihúsamenningu þar sem gestir setjast niður, njóta stundarinnar og dvelja án tímapressu. Gestir fá þjónustu við borð og lögð áhersla á að fólk geti komið eins og það er, fengið sér kaffi, snarl eða jafnvel vínglas og fundið sig velkomið.

Matseðillinn ber skýr merki þess að hann er saminn af kokkum. Smurbrauð eru hugsuð sem sjálfstæðir réttir og borin fram á diskum með heitum sósum og meðlæti. Þar má meðal annars finna falukorvssamloku með sinnepssósu, en falukorv er sænsk, gróf og mild reykt kjötpylsa sem yfirleitt er unnin úr blöndu af svína- og nautakjöti ásamt kartöflumjöli og kryddi.

Einnig eru í boði diskar með brauði og litlum réttum sem ætlaðir eru til að bera fram með eða ofan á brauðið. Morgunverðarseðillinn samanstendur af eggjaréttum, graut, eigin langfil (súrmjólkurafurð) með kompotti og múslí, auk samloka fyrir þá sem eru á ferðinni.

Metnaðurinn endurspeglast ekki síður í hráefni og handverki. Álegg og meðlæti er unnið á staðnum, þar á meðal falukorv, súrsað grænmeti, síld og graflax. Þessi nálgun er óvenju metnaðarfull í kaffihúsarekstri og endurspeglar skýra stefnu um að færa handverk eldhússins inn í kaffihúsaumhverfið.

Eken er með áfengisleyfi og framleiðir jafnframt eigin punsch, svonefnda bagarpunsch (sætur og kryddaður líkjör), sem ber keim af vanillu, kardimommum og nýbökuðu brauði. Markmiðið er að sameina hefðbundna kaffihúsaupplifun og þá afslöppuðu stemningu sem áður einkenndi klassísk ölkaffihús þar sem ólíkir hópar gesta komu saman og dvöldu um stund.

Fyrstu vikurnar hafa einkennst af mikilli vinnu og stöðugri þróun. Reksturinn er nýhafinn og teymið mótar verkferla samhliða opnun, fínstillir bragð og þjónustu og stefnir markvisst að því að auka gæði jafnt og þétt. Þetta er aðeins upphafið að metnaðarfullri vegferð á kaffihúsamarkaði í miðborg Stokkhólms.

 

View this post on Instagram

 

A post shared by Stefan Ekengren (@stefanekengren)

Myndir: ekencafe.se