Smakkseðill ÓX og Etoile sló í gegn hjá sælkerum. „Við förum svo til þeirra núna í janúar“ – Myndir

Þráinn Freyr Vigfússon, matreiðslumaður og eigandi ÓX, ásamt Danny Falkeman, Rakel Wennemo og Jonas Lagerström, eigendum og yfirkokkum Michelin-veitingastaðarins Etoile.

Nú á dögunum gafst einstaklega spennandi tækifæri fyrir sælkera þegar ÓX í Reykjavík sameinaði krafta sína við hið virta Michelin-veitingahús Etoile í Stokkhólmi. Staðirnir buðu upp á sameiginlegan smakkseðil þar sem sænsk og íslensk matargerð runnu saman á nýstárlegan og fagurlega hátt.

Etoile hefur hlotið bæði Michelin-stjörnu og hina eftirsóttu Grænu stjörnu fyrir skýra og ábyrga sýn á sjálfbærni. Veitingastaðurinn er staðsettur í hjarta Vasastan í Stokkhólmi og var stofnaður af matreiðslumönnunum Jonas Lagerström og Danny Falkeman.

Þeir eru þekktir fyrir að tvinna saman hugkvæmni og norræna nákvæmni í matargerð, þar sem um tuttugu rétti smakkseðilsins mynda upplifun sem er bæði fjölbreytt og eftirminnileg. Réttirnir bera sterkan svip norrænnar nákvæmni, en ferðast jafnframt á bragðlaukum gesta milli heimsálfa þar sem alþjóðlegur innblástur og staðbundin hráefni mynda heild sem stendur vel undir nafni.

Þráinn Freyr Vigfússon, matreiðslumaður og eigandi ÓX, segir í samtali við Veitingageirann að samstarfið hafi heppnast afburðavel.

„Gekk mjög vel og þau voru mjög ánægð með dinnerinn“

segir hann og bætir við að samstarfið haldi áfram á nýju ári.

„Við förum svo til þeirra núna í enda janúar og gerum sameiginlegan dinner á Etoile“.

Með þessu samstarfi stíga ÓX og Etoile inn á spennandi vettvang þar sem tveir metnaðarfullir staðir miðla sín á milli, tengja saman tvær borgir og sýna hvað norræn matargerð getur gert þegar hún er leikin af hugviti og ástríðu.

Myndir: aðsendar